PNG i mekim histori taim o i winim OFC nations Cup resis long Suva las wik Sarere agensim Fiji, 2-1.

HAT WOK MERI: Ol PNG Soka meri i winim namba wan taim OFC Women’s Nations Cup. POTO: PNGFA.

Ezekiel Lawrence i raitim

PAPUA Niugini i mekim histori long OFC Women’s Nations Cup resis, taim ol i winim dispela taitel namba wan taim tru long Suva, Fiji, long las wik Sarere, 30 Julai.

Papua Niugin i winim dispela resis bihain long ol i daunim ol asples Fiji, 2-1, long gren fainel.

Bihain long ol i lus long New Zealand inap tripela taim (2014, 2010, 2007), ol PNG meri i strongim tru dispela nem olsem ol Pasifik Kwin bilong soka, na kamap sempion bilong Osenia long resis bilong dispela yia.

Tupela namba wan hap gol bilong Meagan Gunemba na Ramona Padio i givim dispela tropi long PNG, na ol i kwalifai long pilai long Inter-confederation Play-Off tonamen bilong FIFA Women’s World Cup long Februeri, 2023.

Dispela gren fainel gem i stat wantaim strongpela atek na difen namel long tupela tim wantaim.

Tupela sait wantaim i soim ol naispela atek pilai bilong ol.

Tasol gutlak i stap long sait bilong PNG, taim Gunemba i apim net bilong ol Kulas insait long 28 minit bilong namba wan hap.

Namba wan gol bilong PNG, we Gunemba i bin putim i kam long hatwok bilong Padio, husat i kikim longpela bal i go daun long rait han sait bilong fil na Marie Kaipu i ranim dispela bal.

Kaipu i kisim dispela bal na trikim tupela difenda bilong Fiji long kona na salim bal isi tasol i go insait long Gunemba long bokis bilong gol kipa.

Kepten Gunemba i no westim dispela bal, em i mekim wanpela pawa kik i go abrusim gol kipa bilong Fiji, Seruwaia Vasuitoga, husat i sanap na paul long kalap long dispela bal na umben bilong gol mak i seksek.

Bihain liklik, fowat bilong Fiji, Trina Davis, i mekim paul pilai long Kaipu na referi i givim penalti kik long PNG ausait long 18 yat boks.

Padio i no westim dispela sans, em i salim bal i flai long het bilong olgeta pilaia i go insait long kona pos bilong Fiji, na PNG i go pas long tupela gol long 34 minit bilong namba wan hap.

Tasol Fiji i no suruk long PNG long asples bilong ol yet.

Difenda bilong PNG, Margret Joseph i wokim paul pilai long wanpela pilaia bilong Fiji klostu long 18 yat bokis bilong ol, na dispela i givim sans long Fiji.

Davis i kikim dispela penalti i go stret long Player-of-the-Tournament, Cema Nasau, husat i putim het bilong Fiji long penalti kik bal bilong Davis long 44 minit na Fiji i kam wanpela gol baksait long PNG.

Tupela tim i traim hat long namba tu hap tasol difens bilong ol i strong tumas na ol i no gat sans long putim gol.

Moa long en, 2018 golden su wina, Gunemba i strongim yet nem bilong em na i joinim Padio na pilaia bilong Samoa, Jayda Stewart, long kisim golden su taitel long dispela tonamen.

Ol tripela pilaia i skorim 5-pela gol long nem bilong ol.

PNG i kwalifai nau long pilai long inter-confederation resis we 10-pela tim long 6-pela konfederesen bai resis.

Dispela 10-pela tim bai bruk i go long tripela grup.

Wina bilong ol dispela tripela grup bai kisim spes long pilai long FIFA Women’s World Cup 2023.

Ol tim husat i kwalifai long pilai long dispela inter-confederation resis em – Chinese Taipei na Thailand (AFC), Cameroon na Senegal (CAF), Haiti na Panama (CONCACAF), Paraguay na Chile (CONMEBOL), Papua Niugini (OFC), na wanpela tim husat i stap namba tri long UEFA resis.

Dispela resis bai kamap long New Zealand long 18-23 Februeri, 2023.

Ol OFC sempion kam bek long ples

SEMPION tim bilong Osenia, PNG nesenel tim bilong ol meri, i kam bek long kantri long Tunde dispela wik long Fiji.

Ol sapota na ol manmeri husat i wok long bihainim gem bilong ol, i bin go pulap long Jacksons ples balus long amamasim na lukim tim i kam bek.

Tim i bin stap long hap moa long tupela wik long OFC Nations Cup soka resis bilong ol meri we ol i bin winim gren fainel agensim Fiji long Suva, 2-1 las wik Sarere.

PNG i winim olgeta gem bilong ol long dispela tonamen bipo ol i kamap long fainel na bungim Fiji.

Dispela win i min PNG bai stap insait long Inter-Continental resis we bai kamap long New Zealand long Februeri, 2023.

Sapos ol i mekim gut long hap bai ol i kwalifai long go pilai long FIFA wol kap bilong ol meri long Julai 20 i go Ogas 20, 2023, long Australia na New Zealand.