Ol PNG Kumuls i stap pinis long England long redi long wol kap, na namba wan gem bilong ol bai kamap long Oktoba 19 agensim Tonga.

KEPTEN: Ol Kumuls i tokaut olsem Rhyse Martin bai go pas long tim olsem kepten long dispela wol kap. POTO: PNG Kumuls.

Ezekiel Lawrence i raitim

BIHAIN long 8-pela krismas, Papua Niugini Kumuls bai bungim Tonga Mate Ma’a gen taim long Totally Wicked Stadium long St. Helens, England.

Tupela bai bung long namba wan gem bilong ol insait long ragbi lig wol kap resis. Las gem bilong Kumuls na Tonga i bin kamap long 19 Oktoba, 2014 long Lae, we Kumuls i bagarapim tru Tonga, 32-18.

Kosa bilong Kangaroos long dispela 2022 ragbi lig wol kap, Mal Meninga i bin kamap kosa bilong PNG long dispela taim.

Long 19 Oktoba dispela yia, Stanley Tepend, husat bai namba wan taim bilong em olsem kosa bilong Kumuls long wol kap bai soim save bilong em tai mol i bungim Tonga. Tepend bai putim ai na tingting bilong em long ekspiriens bilong ol pilaia olsem, Alex Johnston, Nene McDonald, Justin Olam, na sampela ol pilaia bilong NRL na English Super League.

Tonga i gat planti ol biknem pilaia bilong NRL long skwad bilong ol, na dispela bai givim bikpela salens tru long lukim husat bai winim dispela namba wan wol kap gem bilong ol. Kosa bilong Tonga, Christian Woolf, bai putim bilip bilong em long David Fifita, Jason Taumalolo, Felise Kaufusi, na ol strongpela fowet bilong em, Keaon Koloamatangi, Tevita Tatola, Siliva Havili na Daniel Suluka-Fifita, long dispela gem.

Long las tripela intenesenel gem bilong tupela kantri wantaim long 2019 i kam, Kumul bin i winim tupela, na i lus long wanpela.

Tonga tu i winim tupela gem bilong ol, na i lus long wanpela.

Dispela namba wan wol kap gem bilong Kumuls bai kamap long 4:30 (am) Trinde moning (PNG Taim). Namba tu gem bilong ol bai agensim Cook Islands long Trinde 26 Oktoba (4:30 am PNG Taim), na las grup stes gem bilong ol wantaim Wales bai kamap long Tunde, 1 Novemba (5:30 am PNG Taim).

Long wankain taim, PNG Orchids bai pilai namba wan ragbi lig wol kap gem bilong ol agensim Canada long 2 Novemba (3:00 am PNG Taim) long Headingley Stadium, England.

Olgeta gem bilong Kumul na ol arapela gem bai kamap long EMTV.