Morea Baru i kisim wanpela silva medol long weitlifting long putim nem bilong PNG long buk bilong Commonwealth Games.

SILVA MANGI: Morea Baru i winim wanpela medol tasol bilong PNG long Commonwealth Games dispela yia. POTO: Team PNG.

Andrew Molen i raitim

MOREA Baru i putim nem bilong Papua Niugini gen long rekot buk bilong Commonwealth Games taim em i apim 273kg long winim silva medol las wik Sarere long Birmingham.

Baru i resis long 61kg divisen bilong ol man long weitlifting resis we em i apim hevi bilong ain inap long 121kg long snatch na 152kg long clean & jerk long kamapim dispela win mak.

Gol medol i bin go long Muhamad Aznil Bin Bidin Muhamad bilong Malaysia husat i apim 285kg.

Namba tri ples wantaim brons medol i bin go long Gururaja Gururaja bilong India husat i apim 269kg total.

Dispela em i namba tu medol bilong Baru long Commonwealth Games.

Namba wan medol bilong em i bin wanpela silva tu we em i kisim long wankain gem long 2018 long Gold Coast, Australia.

NAMBA TU SILVA: Baru i bin wanpela silva medol tu long laspela Commonwealth Games we i bin kamap long 2018 long Gold Coast, Australia. POTO: Team PNG.

Chef de Mission bilong Team PNG long Birmingham 2022, Michael Henao, i tok Baru i bin soim gutpela strong tru na i pilai gut stret.

“Baru em i no man bilong toktok planti o mekim planti nois tasol strongpela pilai bilong em i save kirapim bel na tingting bilong ol narapela Team PNG pilaia long soim strong bilong ol tu long wanwan gem bilong ol,” Henao i tok.

“Mipela olgeta wanpilai bilong Morea wantaim ol famili na poro bilong long hia na long PNG i amamas long dispela nambawan win bilong em,” em i tok.

Narapela sempion weitlifta bilong PNG, Dika Toua husat i bin winim gol medol long 2018 long resis bilong ol meri, i no bin inap long bungim wankain mak gen dispela yia.

Toua i resis long 49kg bilong ol meri na i apim 170kg total we i lukim em i kam namba foa ples we i abrus tasol long kisim wanpela medol.

Em i sot long 1kg tasol long kisim brons.

Ol arapela spot bilong PNG i go yet.

Gem i op long Julai 28 na bai pas long Ogas 8.