PNG daunim Samoa long kism namba wan ples long gren fainel bilong OFC resis bilong ol meri long Fiji.

 YUMI GO: PNG difenda, Lucy Maino i rausim bal long hap bilong ol insait long Semi fainel gem agenism Samoa. Ol i pilai long Fiji long Trinde dispela wik. POTO: OFC.

Ezekiel Lawrence i raitim

KEPTEN bilong PNG, Meagan Gunemba, i skorim tupela gol long seken hap, na PNG i kisim namba wan ples long gren fainel bilong OFC Nations Cup resis bilong ol meri.

PNG i winim Samoa, 3-0, long kisim dispela tiket.

Tupela gol bilong Gunemba, na wanpela gol bilong Charlie Yanding i kilim paia bilong Samoa long semi-fainel gem bilong ol long Trinde dispela wik.

PNG i go insait long dispela gem wantaim wanpela lukluk na bilip tasol.

Strongpela bilip bilong ol i karim kaikai klostu long namba wan hap i pinis, taim midfilda bilong Samoa, Torijan Lyne- Lewis i abrus long holim bal strong.

Namel long dispela liklik taim we Lewis i no apim het hariap long painim ol wanpilai bilong em, Rayleen Bauelua i hariap tru rausim bal long em, na salim i go long Ramona Padio.

Padio i pusim bal long baksait bilong tupela Samoa difenda, na Charlie Yanding i putim wanpela naispela gol long kisim PNG i go pas 1-0, long 44 minit.

Gunemba i pasim dua olgeta long ol Samoa long namba tu hap.

Em i skoa insait long namba 48 na 79 minit bipo long Sagude Zule i senisim em klostu long gem i pinis.

Long namba wan gol bilong Gunemba, em i kik long kona na bal i go insait stret long gol mak bilong ol Samoa.

Long namba tu gol bilong em, Gunemba i kisim wanpela bal long senta lain na trikim tupela difenda bilong Samoa.

Em i putim wanpela pawa kik longwe yet i go insait long gol mak bilong Samoa.

Tripela fowat bilong PNG i no malolo long bagarapim ol difenda bilong Samoa.

Samoa i traim long brukim banis bilong PNG, tasol Lucy Maino, husat i bin kisim ‘Player-of-the-Match’ long namba tu gem wantaim Tahiti long grup stes, i banisim ol gut.

Kosa bilong PNG, Nicola Demaine i tok ol i kam long dispela tonamen wantaim wanpela tingting tasol.

Em i tok olgeta tim tu i kam long dispela tonamen wantaim wankain lukluk ol i gat long en.

“Mipela i kam long dispela tonamen long go long narapela mak.

“Ol meri (PNG) i putim olgeta tingting bilong ol long dispela gem, na ol i pilai gem bilong ol stret.

“Mi amamas long gem bilong ol, na risal ol i kisim long dispela gem,” em i tok.

Demaine i bin kamap kosa bilong Samoa long 2018 OFC Nations Cup we PNG i bin winim ol 5-0.

Frederica Sakette i bin kamap kosa bilong PNG long dispela taim na ol i winim Samoa long semi fainel.

Gunemba i skorim tripela gol long dispela gem na karim PNG i go long gren fainel, we ol i bin lus long Fiji.

PNG bai redi long pilai gren fainel long Sarere, 30 Julai wantaim wina bilong Fiji na Solomon Islands.

Samoa bai pilai wantaim tim husat i lus long dispela namba tu semi-fainel gem.