IS Sepik gavana, Allan Baird i singaut long ol lain husat i laik divelopim spot i go long narapela mak long lukluk long provins bilong em na wok wantaim long divelopim spot insait long provins.

Dispela singaut i kamap bihainim tingting bilong gavana na ol sitisen bilong Sepik long divelopim ragbi lig long provins na putim wanpela ragbi tim long Digicel Kap resis. Ol i kamapim pinis Sepik Pride Ragbi Lig Klap na i tokaut long neming raits bilong klap pinis long Desemba las yia na i redi tasol long stat bilong Digicel Kap sisen. Gavana i tok ol pipel bilong em bai i no inap lukluk tasol long ragbi. Ol bai lukluk long arapela spot na ol samting ausait long spot long divelopim ol yangpela manmeri long kamap gutpela sitisen long bihain taim. Em i tok visen bilong spot insait long Sepik em long kamapim gutpela rot long ol yangpela long pilai ragbi lig, yunien, soka, etletiks, volibal na ol arapela spot. Sampela arapela program olsem kakao program, leba mobiliti skim, TVET na ol teknikel koles we bai kamap long dispela yia na UOG kempas long Bainik em ol sampela gutpela program bilong helpim na divelopim ol yangpela long provins. Gavana Baird i amamas long sampela pilaia bilong Kumuls bipo i long sapotim ol wok i kamap nau long provins na em i singaut long planti arapela pipel husat i gat visen long divelopim spot i mas go na wok wantaim tim bilong em long Is Sepik provins. Gavana Baird i amamas long EMK Konstraksen Ltd i kamap sponsa bilong Sepik Pride Ragbi Lig na kisim neming rait long putim klap long Digicel Kap long dispela yia.