SIAMAN bilong Papua Niugini Ragbi Futbal Lig Sandis Tsaka i bin amamas na tok gutlak long ol 32 pri-sisen trening skwat bilong SP Hunters na kosa Matt Church long sisen 2022.

Mista Tsaka i tok namel long planti pilaia bilong Digicel Kap kompetisen em bikpela sans long lukim 12-pela nupela pilaia i bai joinim Hunters pri-sisen trening inap fainel skwat bilong sisen 2022. Em i tok dispela ekspiriens bilong sisen 2021 i ken helpim ol gro na bihain taim maski ol ripot bilong dispela yia i no orait tasol moa wok i bin kamap ausait long fil em gutpela aninit long lidasip bilong Stan Joyce, CEO Stanley Hondina na tu olgeta pilaia long bringim fowat. “Mi tok tenkyu long olgeta SP Hunters pilaia wantaim bod memba long pinisim dispela sisen 2021 wantaim gutpela rekot we dispela i ken helpim ol long sisen 2022 taim ol i go bek long Kwinslan,” Tsaka i tok. Mista Tsaka i tok dispela em namba wan long histori bilong PNGRFL olsem SP PNG Hunters i no pas wantaim PNGRFL na stap olsem independen bodi inap sisen 2021 pinis. Em i tok dispela tim em karim plak bilong kantri long insait na ausait bilong fil wantaim. Ol i gat bilip olsem dispela tim i ken go het long bringim bek gutpela ekspiriens na ripot maski planti wok i stap long wokim. “Mipela i askim olgeta ragbi lig famili long lukautim ol long COVID-19 na tu long olgeta SP Hunters pilaia i mas kisim veksin pastaim long trevol ovasis na pilai,” Tsaka i tok. Em i tok gutlak long olgeta 32 pri-sisen trening skwat bilong SP Hunters  husat i bin stap long seleksen tasol ol bai mekim fainel 26 skwat long trevol.

Jacklyn Kimala i raitim