HET Kosa bilong SP PNG Hunters Matt Church i bin tokaut klia olsem 3-pela biknem ekspiriens SP Hunters pilaia Ase Boas, Stanton Albert na Enock Maki i no bai kam bek long sisen 2022 bikos long sampela isu.

“Biknem fowat bilong SP Hunters Enock Maki i bin lusim ragbi lig wok na bai no inap pilai gen, Ase Boas i no bin inapim sampela medikol kwalifikesen olsem na em bai no inap joinim tim na wankain long Stanton Albert tu bai no inap kam bek bikos long sampela hevi bilong famili.” “Mipela nau bai fokas long pri-sisen trening wantaim sapot  bilong Stanley Tepend long stretim sampela gep we nid long mekim bihainim wanem ol asus i bin kamap long 11-pela mun daunbilo long Kwinslan,” Church i tok. “Mipela bai go beis long Runaway Bay  long Gold Coast na trening long pilai sisen 2022,” em i tok. “Mipela i tokim olgeta trening skwat long mekim go insait long fainel 26 skwat olsem na wanem samting mipela mekim olsem NRL sistem long lukim pefomens kwalifikesen long kamapim fainel skwat,” em i tok. Em i tok olgeta i mas trening wankain long fitim fainel skwat na tu olgeta SP Hunters pilaia husat bai trevol i mas kisim veksin pastaim long trevol.

Jacklyn Kimala i raitim