KIRAP long Bogenvil na go long Kansas. Ovasis trevol i bin laspela samting long tingting bilong Alphonse Igish na Jonathan Dende taim ol i lusim ples bilong ol long Bogenvil long Februari 2020 na go long Nesenel Spots Institut long Goroka olsem hap bilong namba wan intek long krapim bek Etlit Divelopman Program.

NSI wok manmeri i bin atendim 2018 Inta Hai Skul kanival na i bin luksave long Buin sekenderi sumatin Dende na i invaitim em long Kamp long Hutjena long dispela yia. Igish husat i graduet long Hutjena Sekenderi long wan yia i go pinis na i pilai ragbi i kamap long dispela kamp tu. Tupela i kisim atensen bilong Etletiks Kosa Samu Sasama husat rekomandim ol long kisim moa trening bilong ol long Goroka. “Tupela i bin amamas tru long kam long Goroka long trening na go het yet long skul bilong ol long apgredim ol mak bilong ol long DODL program bilong PNG University of Technology, “Dairekta Janet Gimots i tok. “Taim Tony Green i bin tokaut long Gren Prix long Mosbi dispela yia olsem mipela bai salim ol i go long USA na  mipela skelim dispela tingting na tupela i bin amamas tru,” Gimots i tok. Wantaim toktok bilong sapot i kam long Rijinol Memba bilong Bogenvil Peter Tsiamalili Jnr na Minista Timothy Masiu ol sumatin i muv hariap. Rijinol Memba i tokaut olsem ol i lukluk long salim moa etlits insait long patnasip wantaim Etletiks PNG i go long trening. Green i tokaut olsem em i amamas long progres bilong tupela etlits dispela yia kain olsem Jonathan husat i ranim gutpela 400m long Pot Mosbi dispela yia, na klokim 48.74 sekens. Mipela save olsem Alphonse i bin gat injeri long 2020 tasol long dispela yia Gren Prix long Mosbi em i stap long baksait bilong Emmanuel Anis insait long 100m na 200m. Wantaim dispela tripela etlit ol bai joinim Leroy Kamau long USA em bai gutpela tru long 4 x 100m rilei. Cloud County Community College i oferim 2 yia program, bihain long planti ol sumatin i transfea i go long ol Univesiti long kisim ol digri program. Ol dispela etlit bai kompet long junia trek na fil program long tupela sisen (2022 na 2023 ) na wantaim Pasifik Gem i bai kamap long Novemba 2023 ol dispela etlit stap long gutpela mak long makim tim. Presiden Green i tok tenkyu long Minista Masiu na Rijinol Memba Mista Tsiamalili long sapot na strongim ol narapela provins long sapotim ol etlit long wankain we. Wantaim ol narapela sikispela nesenel skwad memba husat i stap pinis long Cloud i bai gat bikpela welkam bilong ol etlit na planti sapot taim ol fit in long laip long USA.