PAPUA Niugini Ragbi Futbal Lig (PNGRFL) na ragbi lig famili na ol famili long Malaguna, Rabaul insait long East New Britain Provins i krai long dai bilong foma PNG Kumul Harrison Patiliu.

Patiliu husat krimas bilong em i 66, i dai long ples bilong em long Malaguna namba 1 insait long Rabaul long Mande Oktoba 4, 2021 bihain long em i sik long pelataim. PNGRFL Siaman Sandis Tsaka i tok leit Harrison Patiliu bin Kumul namba 10 na pilai insait long namba wan Tes Mets bilong PNG egensim England long Julai 6, 1975 long Pot Mosbi. “Harrison Patiliu i  debu insait long dispela gem na Kepten bin Paul Chue na ol wan pilai bilong em olsem Billy Wartovo, Robin Guere, Henry Kavanamur na kain olsem Rod Pearce, Vai Karava, Elijah Emori, leit Tara Gau na leit Lohia Daroa.” Tsaka i tok,“em i bin statim ragbi keria long 1973 wantaim Rabaul Kruseidas taim em i bin sumatin long Malaguna Technical skul long Rabaul.” Long 1974, leit Harrison i transfe i go long Pot Mosbi long stadi long Idubada Technical college we nau em i Port Moresby Technical college na joinim Hanuabada Hoks ragbi lig klab. Long dispela yia yet em i representim Sauten Zon long pilai egensim Hailans Zon long Goroka,” Tsaka i tok.  Em i kontiniu long pilai wantaim Hanuabada Hoks long 1975 na i bin ki man long Hoks i winim Pot Mosbi Ragbi Lig primiasip long dispela yia. Dispela gutpela fom i lukim em stap long seleksen bilong namba wan nesenel PNG Kumuls tim olsem seken roa long namba wan Tes Mets tru egensim England long Julai 6, 1975 long Pot Mosbi,” Tsaka i tok. Leit Harrison i go bek long Rabaul long 1977 na kontiniu pilai insait long Rabaul lig kompetisen na representim Niugini Ailan zon long ol arapela pilai. Long makim maus bilong PNGRFL Bod, Menesmen na staf, PNG LNG Kumuls Kosa Michael Marum, ol pilaia long bipo na nau na ragbi lig fameli insait long kantri, mi laik surukim bel sore i go long Eva Patiliu, pikinini man Epharim Junior, pikinini meri Nemika Patiliu na faivpela tumbuna pikinini long pasin bilong man, papa na bubu bilong ol,” Tsaka i tok. Fineral sevis i kamap long Trinde Oktoba 6, 2021 long Malaguna United sios na bihain beriel long Malaguna matmat long Rabaul. PNG LNG Kumuls Kosa Michael Marum i representim PNGRFL wantaim ol foma PNG Kumuls David Tamtu, James Kapia, Lucas Solbat, August Joseph na Chris Purkikil na presentim wan pela Kumul Jesi i go long famili. Go malolo bilong oltaim. Kumul Namba 10 Harrison Patiliu.