PLANTI ol spots ripota bilong PNG long 1990s bai save gut o tingim yet dispela nem Alfred Gabong bikos em wanpela sempion soka pilaia husat i save pilai strong tru long beklain bilong PNG Nesenel Soka tim.

James G.Kila i raitim

Tude dispela bagaros i stap tasol olsem wanpela praivet sitizen bilong kantri, tasol pikinini meri bilong em Yvonne Gabong i wok long pilai soka nau mekim nem yet na karim nem bilong papa na tumbuna bikos em i stap long PNG Nesenel Wimens Soka tim, na tu em biknem pilaia husat i pilai nau wantaim Genesis Soka.

Dispela bagaros bilong Madang sempion soka pilaia husat i save pilai long beklain bilong PNG tim egensim ol arapela kantri long Pasifik Gems na tu long ol ovasis tonamen. Alfred Gabon gem wanpela memba bilong sempion Madang Soka Skwat husat i bin winim PNGFA Kap egensim Mosbi.

Long dispela taim ol lain husat i pilai long tim em liklik brata bilong em yet Danny Gabong, Dickson Laviong, Amos Romo, Tweedy Malagian, Fred Tonten,Tirimo Topio na gol kipa long dispela taim em Carson Victor. Ol trupela sempion tim bilong Madang long bipo. Alfred i bin stat pilai soka wantaim Nabasa Futbal Klab na bihain em i go pilai sampela taim liklik wantaim

Momase Long las wik antap Alfred i makim lokal kampani bilong ol papagraun bilong Raikos yet nem bilong en Wass Matau Limited na i bin kalap long moto bot na katim solwara i go olsem long ples Bipi. Long hap Alfred i stap long wanpela dabol klasrum na haus-tisa opening seremoni we i bin kamap long Bibi praimeri skul.

Long dispela seremoni Gabong i makim papagraun kampani Wass Matau Limited long givim wanpela nupela bras kata masin bilong katim gras i go long ol lain long Bibi Praimeri Skul. Dispela kampani em liklik brata i go pas wok olsem jeneral menesa na em i salim bikpela brata Alfred long go mekim presentesen.

Bibi praimeri skul i stap insait long Siroi eria long Astrolabe Be LLG long Raikos distrik bilong Madang provins, na Wass Matau em kampani husat i makim ol papagraun bilong Astrolabe Be LLG naem i moa gutpela long lukimkampani i givim kain liklik helpim i go long praimeri skul.