GOROKA Lahanis  i bin winim las raun bilong 2021 Digicel Kap sisen na hangamapim su long las wik Sande long Nesenel Futbal Stedium. PRK Galp Isou tu i bin kam antap gut long hangamapim su wankain olsem Lahanais bihain long tupela wantaim i no painim ples long top sikis bilong kompetisen.

Dispela win bilong Lahanis i pinisim sisen gut bihain long ol i bin autim Isou wantaim bikpela poin mak 22-16 na long wankain

taim tu ol Gurias autim Mioks long kisim spes insait long top sikis. Kosa bilong Goroka Lahanis Gonzela Urakusie i tok bikpela impruvmen long lukim ol pilaia bilong em pefom na pinisim sisen wantaim win tasol ol bai traim kam bek neks yia wantaim sampela nupela senis. Em i tok dispela 2021 sisen i divelopim planti ol nupela yangpela pilaia olsem na no gat bikpela senis i kamap long tim. “Mipela i bin statim sisen gut wantaim planti ausa tasol beis long tingting bilong wan wan pilaia

insait na ausait long fil i no stret long taim bilong gem na tu planti pilaia i no gat gutpela sapot bilong ol na tim wok,” kosa bilong Galp Isou i tok. Em i tok bikpela tingting bilong ol long mekim go insait long top sikis tasol no gat dispela yia daunim tingting bilong ol long wok moa strong gen neks yia. Bikpela amamas long tupela tim wantaim long resis long top sikis ples tasol no gat tupela wantaim pundaun na givim spes long Gurias go insait.

Jacklyn Kimala i raitim