OL Tim PNG i redi na kamap pinis long dispela 2020 Tokyo Olimpik Gems bai kamap long Japan long dispela wik, Jenerel Seketeri bilong PNG Olimpik Komiti Auvita Rapilla i tok.

Ol namba wan grup bilong Tim i bin lusim Jacksons ples balus, Pot Mosbi long las wik Sarere na go long Singapore na go long Tokyo wantaim Chef de Mission Tamzin Wardley.

Ol etlit na opisal wantaim Chef de Mission nau stap long aisolesen long redim ol long go long Tokyo bihainim  bilong ol rikwaimen bilong Olimpik Gems.

Long wankain taim ol etlit kisim tupela taim veksin pinis na ol soim amamas bilong ol long dispela sapot i go long Tokyo Olimpik Gems.

Em i tok olsem ol kisim planti sapot  long ol kopret patna bilong ol na tu long wan wan ol spot klap bilong ol na redim ol yet pastaim long dispela trevol.

“Ol tim i redi long go; Chef de Mission Wardley na menesmen i bin wokim bikpela wok long olgeta balus trevol bilong ol Pot Mosbi tim, Brisbane, US na Thailand tu long bung wantaim long Tokyo,” Rapilla i tok.

Ol bai opim seremoni bilong Tokyo Olimpik Gem long 23 Julai, 2021 na ol gem bai stat long tupela wik taim wantaim pasim seremoni long 8 Ogas, 2021.

Ol PNG Olimpik Tim wantaim 8-pela etlit na 11 opisal i bin trevol go pinis long Japan.

Jacklyn Kimala i raitim