PNG AFL bai statim sisen propa bilong ol long dispela wiken bihain long ol pasim olgeta pilai bilong ol long las 2020 bihain long Covid 19 sik i kamap.

Long las wiken, AFL PNG i kamapim tupela de prisisen long pulim ol klap long kam bung wantaim long statim sisen bilong dispela yia bihain long Kontrola David Manning i givim tok orait long ol long statim pilai.

No gat nupela tim i kam insait long kompetisen bilong dispela yia. Ol olpela tim nau i kisim planti bilong ol sumatin husat i amamas long pilai dispela spot i go insait long klap.

AFL pilai graun long Bisini i stap isi longpela taim stret,na dispela wiken bai lukim nois bilong ol sapota bai bringim bek laip bilong AFL pilai graun we i save paia lait long bipo.

AFL PNG i save promotim ol yangpela manmeri long dispela spot na Ezi Loan na Mani Plus i save helpim long sponsa long dispela spot.

Planti bilong ol komyuniti skul insait long NCD save pilai long AFL long wanem i gat spot program bilong em. Dispela program save pulim planti bilong ol yangpela sumatin long pilai insait long AFL.

Nicky Bernard i raitim