PRK MENDI Muruks i daunim ol Wamp Nga Mt Hagen Eagles long raun namba sikis bilong Digicel Kap resis.

Ol mangi Mendi i bin lus long raun namba faiv, tasol ol i pait hat egensim ol mangi Hagen long Sande bilong wik i go na i win wantaim 30-20 poin.

Long ai bilong planti manmeri long Lae Ragbi Lig pilai graun, ol i lukim Clement Lama bilong ol Muruks i putim namba wan trai long namba 12 minit bilong resis taim.

Ol Muruks i stap pas wantaim 6 poin bihain long konvesen kik i go insait.

Ol Eagles i pait hat long bekim trai bilong ol Muruks, tasol banis bilong ol Muruks i strong tru i na ol Eagles i mekim wanpela hai takol na hap-bek bilong ol Muruks, Josiah Jimmy, i kisim 2-pela poin long penalti kik.

Dispela i skruim skoa bilong ol Muruks i go antap long 8 poin inap Desmond Michael bilong ol Eagles i putim namba wan trai bilong ol Eagles tasol konvesen kik i no bin go insait.

Ol Muruks i kisim 2-pela poin gen long penalti egensim ol Eagles we Jimmy i kik i go insait.

Dispela i surukim skoa bilong ol Muruks i go antap yet na ol i stap pas, 10-4, poin inap ol i bungim pinis bilong namba wan hap bilong resis taim na ol i bin go malolo.

Ol i no bungim 10 minit yet bilong namba tu hap bilong resis na ol Muruks i putim wanpela penalti kik i go insait bihain long wanpela asua i kamap na referi i givim penalti egensim ol Eagles.

Long wankain taim, wanpela trai bilong ol Muruks I kamap gen we skipa bilong ol, Wesser Tenza, I putim na kovensen kik i go insait tu.

Dispela i surukim skoa bilong ol Muruks i go antap yet na i sanap olsem 18-4 poin.

Ol Eagles i putim wanpela trai gen tasol konvesen kik i no bin go insait. Bihain long dispela trai, Leon Undipi bilong ol Muruks i putim wanpela trai gen we konvesen kik i no go insait tu.

Taim skoa i sanap olsem 22-10, ol Eagles i belhat na pait bek na kepten bilong ol, Henry Wan, i putim wanpela isipela trai na konvesen kik i go insait.

Bihain long dispela trai, Eliza Peter, husat i save pilai long wing bilong ol Eagles i putim narapela trai gen, tasol konvesen kik i no bin go insait.

Skoa i sanap olsem 22-20, we ol Eagles i slekim strong bilong ol Muruks na ol i bin pait hat yet, tasol wanpela asua i bin kamap na referi i givim penalti egensim ol Eagles gen.

Ol Muruks i surukim skoa bilong ol i go antap long 24-10 wantaim dispela penalti kik.

Wantaim wanpela minit i stap yet long bungim pinis bilong resis taim, senta pilaia bilong ol Muruks, Levia Andrew, i brukim banis bilong ol Eagles na i putim laspela trai we skoa i sanap olsem 30-20.

Ol i bungim pinis bilong resis taim na ol Muruks i win wantaim 10-pela poin.

Philemon Tame i raitim