LAS wik long Haisi komyuniti wanpela bikpela volibal tonamen i bin kamap long helpim Haisi peris bungim mani long pinisim ol komyuniti projek bilong en.

Insait long dispela tonamen Hinau volibal klab bilong Buka taun, Not Bogenvil, i bin winim olgeta gem bilong ol na ol go aut wantaim K800 olsem namba wan prais mani.

Dispela prais mani em ol Buka Bahasi Eban Komyuniti i bin sposa long em. Buka Bahasi Eban Komyuniti em ol lain bilong Haisi peris yet husat i stap long Buka taun.

I bin gat 5-pela narapela tim husat i kam long ol narapela hap long Saut Bogenvil, olsem Rino bilong Tokaino Peris, Ittu Eels bilong Pinano Peris long Buin Dineri na Rangers bilong Siwai na Mangas 1 na 2 bilong Haisi Peris yet.

Klab Hinau em wanpela kampani bilong Buka yet, Island Waves i bin sponsa long em. Kampani ya em wanpela famili bilong Haisi yet i papa long em. Ol bin sponsa tu long narapela tupela tim long divisen bilong ol meri.

Rino volibal klab i bin kam namba tu na winim K600 na Rangers i bin kam namba tri na kisim K500.

Long pilai bilong ol meri, i bin gat 9-pela tim olgeta i bin pilai resis long winim K800. Em tu em sponsasip bilong Buka Bahasi Eban Komyuniti  yet.

Gren fainel bilong ol meri i no bin pinis gut bikos long bipela ren i bin kamap taim Hinau  bilong Buka i wok long pilai wantaim Toira wanpela tim bilong Siwai yet.

Bikos long dispela ol opisal bilong tupela tim i bin bung wantaim ol ogenaising komiti na olgeta i bin wanbel long larim tupela tim i kisim K700 wan wan. Ol i bungim namba wan prais (K800) na namba tu prais (K600) wantaim na hapim namel long tupela tim.

Long ol 9-pela tim husat i bin pilai resis long divisen bilong ol meri, Hinau i bin kam wantaim tupela tim, wankain tu long ol Wantoks bilong liklik ples Ororo na Mangas, em tim bilong ol lain klostu long Haisi Misin yet. Michael's em tim bilong ol Sirokoro BKK. Ol narapela em ol Toira na HB em kam long ol narapela hap bilong Siwai yet.

Dispela tonamen em Haisi Peris Kaunsil i bin kamapim long bungim sampela mani bilong wokim nupela haus lotu bilong em.

Ol tim i bin putim K250 fi long pilai long dispela tonamen. K50 long dispela em bon fi we  ogenaising komiti i bin putim long kontolim ol  tim na ol sapota bilong ol long no ken mekim hevi olsem kros pait na bagapim ol samting long taim bilong pilai. Olgeta tim i bin kisim bek dispela bon fi bilong ol bihain long olgeta pilai i pinis, bikos olgeta pilai i bin pinis gut tasol.

Paul Wagum i raitim