PAPUA Niugini Ragbi Futbal Lig (PNGRF) i bin tokaut long ol nupela rot na plen bilong en ol i kolim ‘Niu Ailan Model’ long wanpela kibung bilong ol wantaim Noten Konfederet we i bin kamap long Madang las wik.

Ol bod ov dairekta bilong PNGRFL wantaim Sif Eksekutiv Opisa, Stanley Hondina i bung wantaim ol afiliet lig asosesin bilong PNGRFL long Madang Star Intanesenel Hotel long dispela miting.

Ol arapela dairektas husat i stap long dispela miting long Madang em Graeme Osborne, Toksy Nema na Robin Iveke.

PNGRFL dairekta bilong Noten Konfederet, Robin Iveke i tokaut olsem as tingting bilong dispela kibung bilong PNGRFA dairektas wantaim presiden bilong ol afiliet lig long Noten Konfederet em long tokaut klia long ol long wanem rot bilong divelopim ragbi lig long kantri bihainim nupela model ol i kolim ‘Niu Ailan Model’.

Sif Eksekutiv Opisa bilong PNGRFL, Hondina i tokaut olsem dispela nupela rot long bihainim long divelopim ragbi lig long kantri em ‘Niu Ailan Model’ na ol i bin launsim long Nu Ailans provins we Gavana Sir Julius Chan yet i launsim na plen ya em i gutpela na olgeta ragbi lig sentas long PNG bai i mas bihainim.

Hondina i tok olsem wan wan kopi bilong dispela nupela plen em ol lig senta husat i afliliet long PNGRFL i mas kisim na holim na bihainim long kamapim ol plens bilong ol yet we i go gut wantaim bikpela mama bodi em PNGRFL.

Ol afiliet ragli lig senta husat i bin kamap long dispela miting long Madang em presiden bilong Lae Ragbi Lig, Adrian Chow, presiden bilong Madang Ragbi Lig, Paul Passingan, presiden bilong  Bulolo Ragbi Lig, Paul Tini  na tu ol opisal i makim Ramu Suga lig, ol spots masta bilong ol sekenderi skul  long Walium, Dumpu na tu ol opisals bilong Yuniti Ragbi Lig long Divain Wod Yunivesiti (DWU).

Ol arapela lig sentas long Noten Konfederet husat i no kamap long miting em Wewak, Sentral Sepik (Maprik), Vanimo, Wau na Kainantu.

James G. Kila i raitim