PNGFA Kompetisen Dipatmen i bin tokaut long dispela Kantri primia futbal kompetisen, Nesenel Soka Lig bai kik ov long Julai 24 2021.

Ekting PNGFA Kompetisen Dairekta Menesa Roosje Suwae i tok ol tim i save pinis olsem Julai 24 em nupela deit bilong statim sempiansip.

Mista Suwae i tok ol surukim dispela bikos long sampela rikwaimen bilong ol NSL kosa, referi,long holim sotpela kos na menesa woksop na opim pastaim long statim kompetisen dispela wiken.

PNGFA na ol Kompetisen Dipatmen i bin makim deit 17 Julai dispela wiken tasol nupela luk NSL Kompetisen bai lukim tupela konperens wantaim 7-pela tim long Noten Konperens na 7-pela tim Sauten Konperens.

Suwae i tok PNGFA Teknikol Tim i bin holim kos bilong ol referi na kosa long ol teknikol opisal husat bai stap long semi-profesenel kompetisen.

Em i tok dispela kompetisen Dipatmen i bin holim woksop bilong ol tim menesa long Lae bilong ol Noten Konperens tim, na wankain long ol menesa bilong Saunten Konperens long Mosbi.

Dairekta bilong Kompetisen i tok dispela kompetisen bai pilai aninit long COVID-19 Protokol na kompetisen helt na seifti bai stap long tupela pilai graun em long Sir Ignatius Kilage Stedium long Lae na PNG Futbal Stedium long Pot Mosbi.

PNGFA i wok klostu wantaim Nesenel Kontrol Senta (NCC) na ol PNGSF Pandemik Menesmen Komiti long wok fowat na lukim sapos mipela ken gat sapota long NSL kompetisen.

Jacklyn Kimala I raitim