GOROKA Lahanis i bin amamas long winim top tim PRK Mendi Muruks tim husat i sindaun antap long leta las wik Sande.

PRK Mendi Muruks i salensim Goroka Lahanis inap ol Lahanis winim ol wantaim 1-pela poin 21-20 long raun 5.

Dispela namba wan win bilong Lahanis i mekim ol kalap go antap na kam daun long soim namba wan bikpela amamas win long daunim top tim Muruks.

Namel long ol 5-pela raun, PRK Mendi Muruks i bin lus long wanpela gem na win 4-pela taim.

Kosa bilong Goroka Lahanis Gonzela Urakusie i tok tenkyu long gutpela gem bilong tim long winim dispela raun 5 olsem namba wan taim bihain long ol i bin lus long 4-pela raun bilong sisen.

Em i tok ating dispela win bai i ken pusim ol i go long ol arapela raun bai kamap gen long bungim wankain tim olsem Muruks.

Kosa bilong PRK Mendi Muruks, Roderick Puname i tok amamas long hapbek bilong Lahanais husat i yusim het long kisim fil gol poin na winim Muruks.

Em i tok dispela i bin salensim ol Muruks long wok strong na no ken lus namba tu taim gen.

Long dispela wik bai lukim Goroka Lahanis bungim Moni Plus Vipers taim Muruks bai salensim Mt Hagen Eagles.

Jacklyn Kimala i raitim