MOA long 30 soka kosa na referi long Madang provins i bin stap long wanpela kosing klinik long lainim ol nupela rul bilong pilai soka na wanem ol divelopmen bilong gem tude.

Dispela faivpela de kosing klinik em PNG Futbal Asosesin (PNGFA) i kamapim wantaim sapot bilong intenesenel soka bodi FIFA.

Dispela PNGFA referi na kosa trening long Madang we i bin kamap long Laiwaden oval namel long Madang taun i lukim tu ol referi na kosa bilong ol rurel soka asosiesen long provins i kamap long lainim ol nupela lo bilong FIFA

Vais Presiden bilong Madang Soka Asosiesen (MSA) John Maripal i tok tenkyu long PNGFA aninit long lidasip bilong Presiden John Kapinato long luksave olsem Madang olsem provins we soka em namba wan spot na planti ol yangpela pipel long taun na distrik i save pilai.

Maripal i tok em longpela taim tru long lukim kain soka kosa klinik i kamap gen long Madang na i tok tenkyu long PNGFA long luksave long Madang na i bringim trening klinik i go long hap.

Trening klinik i lukim tu sampela ol meri kosa i stap long lainim pasin bilong kosa.

Wanpela meri kosa bilong Madang Juanita i tok amamas long PNGFA long kamapim trening long Madang.

Juanita i tok Madang i kamapim planti ol nesenel soka pilaia husat i makim PNG long ol bikpela pilai tasol ol i nogat planti meri tumas i kamap olsem soka kosa. Na long em long stap insait long dispela trening em i amamas tru bikos dispela bai opim tingting bilong em long lainim ol nupela rul o lo bilong soka na em bai bringim i go daun long klab bilong em

Em i tok Madang i kamapim planti ol nesenel soka pilaia husat i makim kantri long intanesenel gem olsem Pasifik Gems na tu long Wimens Wol Kap long pastaim tasol no gat planti meri i holim  wok olsem kosa long tim.

Juanita i tok wanpela meri tasol husat i kisim kosing setifiket na i kamap kosa long Madang em Rachael Wadunah, husat i lukautimTusbab Stallions Soka tim we i pilai long Nesenel Soka Lig (NSL) long kantri.

Dispela meri Rachel em PNG Futbal Asosiesen i bin makim em pinis olsem asisten kosa bilong PNG nesenel wimens soka tim.

James G. Kila i raitim