PNG FUTBAL Asosiesen bai bung wantaim nupela rikwaimen bilong Deputi Kontrola bilong Nesenel Pandemik, Dokta Daoni Esorom, i putim bilong olgeta afiliet spot federesen i mas bihainim bipo long ol i statim kompetisen bilong ol.

Jeneral Seketeri bilong PNGFA, Pius Letenge, i tok Nesenel Kontrol Senta (NCC) i bin givim ol dispela nupela agrimen rikwaimen bilong ol afiliet spot federesen.

Dokta Daoni Esorom i bin tokim olgeta nesenel spoting federesen olsem ol i mas aplai long bihainim ol mesa long ranim kompetisen bilong ol;

1. Tokorait long COVID-19 Protokol long wan wan ol spot kam long NCC.
2. No gat sapota, o ol famili memba i go long kompetisen.
3. Olgeta pilaia na opisal i mas kisim COVID-19 veksin long dispela kompetisen.

Mista Letenge i tok PNGFA na dispela kompetisen Dipatmen bai statim primia man futbal kompetisen, ol Nesenel Soka Lig long tupela konferens.

“Mipela bai no gat hom na awei NSL kompetisen, bikos planti bilong ol pilaia i les long kisim veksin. Long taim olgeta tim i wanbel long kisim veksin, bai i gat hom na awei kompetisen,” em i tok.

Mista Letenge i tok said PNGSF Pandemic Management Committee (PMC) i mas mekim moa awenes long ol spot federesen bikos i gat planti pilaia husat i tingting planti long kisim veksin.

PNGFA i laik lukim dispela primia kompetisen i kamap na ol futbal mets bai kamap long Lae na Pot Mosbi tasol.

Jenerel Seketeri i tok PNGFA i singautim ol 14 klap husat i bin givim nem bilong ol long dispela nupela NSL Konprens kompetisen. Bai 7-pela tim i pilai long Noten Konprens na narapela 7-pela tim bai pilai long Sauten Konprens.

Long Noten Konprens bai Sepik FC, Tusbab FC, Lae Siti FC, Lae Siti Dwellers FC, FC Morobe Wawens, Morobe Yunaitet FC na Noten Divelopmen Tim, i pilai.

Long Sauten Konprens bai Pot Mosbi Strikers FC, Hekari Yunaitet FC, Star Maunten FC, Galp Komara FC Sentral Dabara FC, Tavur FC na Sauten Divelopmen Tim i pilai.

PNGFA Seketeri i bin daunim K80,000 fi go K51,500 long wan wan tim long pilai long dispela kompetisen.

PNGFA bai givim bek mani bilong ol klap husat i bin baim ful afiliesen fi bilong ol. Na long wankain taim tu, ol bai wokim nupela invois bilong K51,500 long ol klap husat i no baim yet ol afiliesen fi bilong ol na pilaia rejistresen fi inap long 28 Jun, 2021.