HET Kosa bilong EPG Enga Mioks Andrew Andiki i bin tokaut olsem tim i nidim planti ekspiriens pilaia na olpela pilaia husat ol i bin pilai pinis na save long gem.

Dispela hevi i bin kamap bihain long ol 23 Mioks pilaia i bin les long kisim veksin na lusim kemp.

“Mipela i kisim bikpela taim long selektim ol 23 nupela pilaia gen long senisim ol olpela husat i bin lusim kemp long statim 2021 sisen raun 1 inap raun 4,” Andiki i tok.

“Mipela i bin gat 15 wik fri sisen na olgeta 23 sinia ekspiriens pilaia i bin lusim kemp na nau dispela ol nupela pilaia long tim i no bihainim tingting bilong mi bikos 13 pilaia em ol nupela na mipela no gat gutpela ekspiriens hapbek tu long ogenaisim gem,” Andiki i tok.

Em i tok bihain long olgeta 4-pela raun bilong 2021 sisen Mioks mekim wankain asua long gem na long salensim Galp Isou tim husat i gat ekspiriens hapbek long win wantaim 2-pela poin long raun 4. Em bikpela salens long ol Mioks long impruv.

Em i tok planti ol nupela pilaia long Mioks na planti moa wok long wokim na traim long go insait long top 6.

“Mi no ting olsem dispela samting bai kamap bihain long sisen stat tasol mipela bai traim long stretim dispela ol asua na senisim pes bilong gem long abrusim wankain asua,” em i tok.

Jacklyn Kimala i raitim