TUPELA tim antap long maunten, PRK Mendi Muruks na Wamp Nga Mt Hagen Eagles i daunim tupela tim daunbilo long nambis, Kimbe Cutters na Rabaul Gurias.

Mendi Muruks i daunim ol Kimbe Cutter, 34-8, long raunn amba 4 bilong Digicel Kap resisi bin kamap long Lae long Sande bilong wik i go.

Tupela gem i kamap long wankain taim we namba wan resis i kamap namel long ol mangi long Mendi wantaim ol boi Kimbe. 

Ol Muruks i kam na soim tru kala bilong ol long namba 8 minit bilong pilai we senta bilong ol Muruks, Clent Lama, i kisim bal long wing na i putim namba wan trai.

Wesley Batari, husati save pilai faiv-eit bilong ol Muruks i skruim skoa i go antap long 6-0 wantaim tupela poin bihain long em i kikim konvesen i go insait.

Banis bilong ol Kimbe i no strong we Leon Undipia, husat i save pilai long wing i putim namba tu trai bilong ol Muruks. Konvesen kik bilong dispela trai i no bin go insait.

Ol Muruks i strongim banis bilong ol na i no bin givim liklik sans long ol Cutter inap ol mangi Mendi i putim namba tri trai gen.

Batari i putim dispela namba tri trai long 7-pela minit i stap yet long bungim pinis bilong namba wan hap bilong resis.

Konvesen kik bilong dispela trai i no bin go insait we ol Muruks i stap pas wantaim 14-0, inap ol i bungim pinis bilong namba wan hap bilong resis taim.

Ol Kimbe i painim hat tru long brukim banis bilong ol Muruks long nambatu hap bilong resis we Nelson Yei bilong ol Muruks i putim namba foa trai long 46 minit bilong resis.

Yei I soim kala na stail bilong em yet na i putim tupelo trai gen. Dispela i skruim skoa bilong ol i go antap long 28 poin.

Ol Cutter i pinisim laspela strong bilong ol we prop bilong ol, Simon Johnson, i putim namba wan trai bilong ol, tasol konvesen kik i no bin go insait.

Ol Muruks i skruim skoa bilongol yet wantaim wanpela moa trai we konvesen kik i no bin go insait. Skoa I sanap olsem, 34-4, bihain long dispela trai.

Ol Cutter i pait hat taim wanpela minit i stap yet long bungim pinis bilong resis we senta bilong ol, Sydney Koi, i putim namba tu trai bilong ol.

Philemon Tame i raitim

Konvesen kik I no bin go insait we laspela skoa I sanap olsem, 34-8, naol I bungim pinis bilong resis taim.

Long wankain taim, namba tu resis i kamap namel long ol Eagles na Gurias we ol Eagles i daunim ol Gurias wantaim tupela poin, 12-10.

Ol Gurias i soim tru kala bilong ol long namba wan hap bilong resis we ol i bin stap pas wantaim 10-0 poin.

Tasol, ol Eagles i kam bek wantaim pawa bilong ol bihain long malolo na i flai antap long ol Gurias.

Ol Eagles i strongim tru banis bilong ol na i bin bekim tupela trai bilong ol Gurias we wanpela konvesen kik i go insait. Tupela tim i stap wantaim wankain skoa, 10-10.

Klostu long pinis bilong resis taim, ol Gurias i mekim asua na referi i givim penalti long ol Eagles we ol i bin skruim skoa bilong ol i go antap wantaim tupela poin long penalti kik.

Ol Eagles i stap pas wantaim 12-10 poin inap ol i bungim pinis bilong resis taim.

Pinis.