Papua Niugini Nesenel Soka Lig sisen 2020 wanpela nupela na biknem tim i save givim strongpela salens long Hekari FC na Lae City FC i pul aut bikos ol i no inap painim mani long helpim ol i pilai long sisen 2021.

Vitiaz United FC i tok ol i bin ranim dispela klap long 2020 long mani mak olsem K500, 000. Dispela olgeta kos i bung wantaim welfea bilong pilaia, ol samting bilong trening, ples bilong slip, alauens na medikol sapot. 

Ekspresen ov Interes (EOI) leta bilong joinim NSL i askim long K10, 000 na K80, 000 registresen fi. Dispela finensal kondisen i mekim klap i pul aut long kompetisen.

Dispela nius i mekim ol sapota na fen i kirap nogut long wanem dispela yangpela Vitiaz United klap i bin mekim kompetisen i kamap narakain wantaim sampela ol yangpela pilaia i gat gutpela talent na skil i kisim klap i go antap long top foa long kompetisen na givim hat taim long ol biknem klap olsem Hekari FC na Lae City FC long las yia 2020.

Vitiaz presiden Mathew Strach i tokim Wantok niuspepa olsem ol i no inap painim wanpela meja sponsa. Strach i tok long taim bilong COVID-19 na taim nogut bilong ikonomik insait long kantri. Ol kampani na bisnis haus i painim hat long lusim mani. 

“Na tu futbal long PNG i nogat bikpela luksave long dispela as na ol kampani i no laik tek pat na helpim soka long kantri.

I gat sampela gutpela samting i bin kamap tasol nogat wanbel na ol i no bin luksave long promotim futbal insait long kantri.

“Taim mipela toktok wantaim ol kampani. Ol i no bin laik spendim mani long soka,” em i tok.

Klap i bin kam insait long kompetisen wantaim yangpela pilaia i gat ol nupela talent las yia 2020 na ol i pilaia strong tru long go antap long top foa (4) na rausim tiket bilong Hekari FC tasol wan poin bilong Obert Bika bilong Lae City FC i bin mekim Vitiaz sindaun long namba tu ples long gren fainel bilong 2020 sisen.

Strach i tok klap bai pilai long lokol kompetisen pastaim ol i bin pilai wantaim long 2013 long Port Moresby Soka Asosiesen long Bisini na ol i ting long kam bek long NSL long bihaintaim.

Menesmen i tok sori long husat ol lain i bin sapotim tim long taim ol i bin pilai long NSL kompetisen olsem wanpela gutpela tim long kompetisen long 2020 sisen.

Joseph Dawai i raitim