FAINENSAL Inklusen em i namba wan long wok bilong BSP bikos em i save promotim ikonomi long gro na long wankain taim i helpim ikonomi bilong narapela hap long gro tu.

Sif Ekseketiv Opisa bilong BSP Robin Flemming i bin mekim dispela tok long taim em bin tokaut long ripot bilong namba 3 kwata bilong BSP Pasifik Ikonomi na Maket  2021. Mista Fleming i bin tok BSP i redi long pait wantaim ol salens we i wok long kamap long fainensal inklusen het bikos bikpela hap bilong populesen bilong PNG i save stap long ol rimot eria na ol i no save kisim sans. “Benk i wok long redi long opim nupela brens long Eriku, Lae na Maunt Hagen. Dispela bai impruvim level bilong sevis long ol kastoma bilong BSP. BSP em benk bilong ol pipel na em bai go het long bringim benking sevis i go long hap hap we ol narapela benk i no save go long en. Mipela i welkamim olgeta lain long joinim mipela long wok wantaim long  fainensal inklusen.” Mista Fleming i tok. Ripot i soim olsem impruvmen i bin kamap long mineral na petroleum indastri long taim stet, Kumul na Barrick i bin wok long go gut wantaim agrimen bilong opim bek Porgera.