I bin gat tok lukaut olsem bikpela hevi bai kamap sapos gavman bilong Libya i no hariap long stretim tupela bikpela dam, nau ol i bruk na wara i kilim planti tausen manmeri.

Long planti yia, ol pipel na sain­tis na wokman bilong gavman i bin wari long dispela tupela dam.

Wanpela saveman bilong wara, Abdul Wanis Ashour i bin raitim ripot we em i tok sapos gavman i no mekim mentenens wok long dispela tupela dam bai siti inap long painim bikpela birua long bihain taim.

“Long taim mi bungim ol data, mi painim olsem i gat sam­pela hevi long Derna Valley: i gat mak i soim olsem simen i wok long bruk; mak bilong ren i bikpela tumas na oltaim bik­pela tait i save kamap long dis­pela eria,” em i tokim Reuters Nius.

“Gavman bilong Libya i save longtaim yet long wanem sam­ting i wok long kamap long Derna River Valley na bikpela hevi em inap kamapim,” Mista Ashour i tok.

Planti pipel bilong Libya tu i belhat bikos gavman i no mekim wanpela samting long taim dis­pela ripot i bin kamap.

Wanpela man long Derna hu­sat i bin klia long ol hevi bilong dispela tupela dam em Yousef Alfkakhiri. Em i gat 63 krismas na em i wanpela histori tisa.

Em i stori long ol hevi bilong wara i tait na bagarapim ples long 1940 i kam inap nau.

Tasol dispela hevi bilong Sande nait i winim olgeta arapela em i bin lukim bipo.

“Olgeta lain i wok long pre na krai wantaim.

“Mipela lukim dai i kamap,” em i tok.

Em i tok dispela pairap bilong wara i spit i kam daun i olsem “nois bilong snek”.

“Long las 10 yia bilong woa, planti tausen pipel bilong mipela i bin dai.

Tasol long Derna ol i bin dai long wanpela de tasol

Gavman long Tripoli na isten edministresen husat i lukautim Derna i no bin mekim wanpela pablik toktok yet.

I bin gat sampela wok bilong stretim dispela tupela dam long 2007.

Tasol bihain long 2011, taim ol i rausim rula bilong Libya, Muammar Gaddafi, ol lain milit­en Islam grup wantaim Al Qae­da na Islamic State i bin tekova na olgeta wok bilong stretim dispela tupela dam i bin stop.

Omar al-Moghairbi, bilong Water Resources Ministry i tokim Reuters olsem maski sa­pos ol i bin stretim ol bagarap long dam, bai em i bruk yet, tasol bai no inap kamapim bik­pela tru long Derna.

PINIS. //