Planti manmeri tru i bin dai long Libya bihain long tupela dam i bruk na wara i kapsait i go aut long ol ples.
OL pipel bilong Derna siti long kantri Libya i wok long kisim bodi bilong planti tausen manmeri wara i bin kilim las wik taim tupela bikpela dam i bin bruk.
Ripot i kam long Lybya i tok ol i painim pinis 11,300 bodi tasol ol i ting namba bai i go antap inap long 20,000 samting. Moa long 10,000 pipel i lus yet na samting olsem 38,000 pipel long Derna i no gat haus nau.
Ol arapel kantri long wol i salim ol savelain i go helpim Libya long painim ol bodi na helpim ol manmeri husat i sot tru nau long ol samting. Wanpela bikpela hevi nau em long helt bilong ol pipel bikos wara i bagarap na i gat planti bodi bilong ol manmeri i slip nabaut insait long graun na ol pipia.
Dispela bikpela birua long Derna siti i bin kamap long las wik Sande bihain long tupela bikpela wara dam i bin bruk na wara i kapsait olsem sunami i go daun long siti na kilim dai ol manmeri na brukim ol haus.
Ol tupela dam long Wadi Riva i stap antap long maunten, dispela wara i save ran i go daun long Derna siti na i go aut long Mediterranean Sea. Ol pipel i bin slip long taim dispela birua i kamap na kilim ol.
Bikpela ren i bin pundaun na wara i pulap long dispela tupela dam na taim dam i bruk, wara i spit tru i kam daun long maunten na kilim ol pipel na bagarapim Derna siti.
Red Crescent bilong Libya i tok moa long 11,300 pipel i dai pinis na dispela namba bai surik i go antap long taim ol i painim moa bodi.
“Bodi bilong ol man i slip nabaut long strit. Wara i bin karim i go aut long solwara na nau solwara i tromoi i kam bek long nambis we graun wantaim ol pipia i karamapim ol,” Bilal Sablouh, forensik menesa bilong International Committee of the Red Cross (ICRC) Africa i tok.
“Long tupela aua, ol wanwok bilong mi i bin painim 200 bodi long nambis klostu long Derna,” em i tok.
Ibrahim al-Arabi, helt minista long Tripoli-ol western kantri i sapotim, i tokim Reuters Nius olsem bikpela polusen tru i stap nau long wara we bodi bilong ol pipel na enimal na kemikel i miks wantaim ol arapela samting na mekim i no seif long man i dring.
“Mipela toksave long ol pipel no ken go klostu long ol hulwara long Derna,” em i tok.
Bikpela wara i kamap nau nogut ol kain sik olsem kolera bai kamap long Derna. Tasol nau yet, i no gat ripot bilong kolera yet.
Bikpela hap bilong Derna siti i no sanap moa. Wara i brukim olgeta haus na arapela samting na karim i go tromoi long solwara.
UN helt ejensi wantaim ICRC na International Federation of the Red Cross and Red Crescent Societies, i askim ol lain i go pas long planim ol bodi, i mas lukaut gut long taim ol i mekim dispela wok.
“I gutpela sapos ol i no hariap tumas long planim ol bodi long wanpela bikpela matmat o kukim ol bodi,” Kazunobu Kojima, medikol opisa bilong biosafety na biosecurity long World Health Organization’s (WHO) Health Emergencies Programme, i tok.
Mista Kojima i tok i gutpela sapos ol i planim bodi long wan wan matmat na rekodim na makim matmat na bai ol famili i ken stap belisi. Em i tok tu olsem bai i gat sampela hevi i kamap long bihain taim.
Dr Margaret Harris, mausmeri bilong WHO i tok ol pipel i mas gat klinpela na seif wara long yusim.
I gat narapela bikpela hevi i stap tu. Planti ol bom na arapela len main i bin stap long graun na nau graun malmalum i karamapim ol dispela bom na i ken pairap long taim man i krungutim.
Imene Trabelsi bilong ICRC i tok bipo long dispela birua i bin kamap, ol i wok long hatwok long traim painim ol dispela len main na rausim ol.
PINIS. //
wantokniuspepa.com