POP Francis i mekim strongpela toktok tru long stopim pasin bilong kamapim vailens egensim ol meri.

Pop i bin mekim dispela singaut long taim em i givim Nu Yia toktok bilong em. Em i tok pasin bilong kamapim vailens long ol meri em i olsem man i tok nogut long God.

Pop Francis i mekim dispela toktok long taim em i bin selebretim lotu long St Peter’s Basilica, Rom long Sarere . Katolik Sios i save selebretim dispela de olsem pestode bilong Maria Mama bilong God na sios i makim dispela de tu olsem Wol Pis De.

Pop Francis i bin wokabaut i go daun long Basilica na wokim lotuPop Francis i gat hevi long lek bilong em we em i save pilim pen na i no inap long sanap longpela taim tumas. Pop i givim Nu Yia skul toktok bilong en long mining bilong mama na ol meri.

Em i tok ol mama na meri i strongim tret bilong laip, na em i mekim strongpela toktok long stopim pasin bilong kamapim vailens long ol meri “Bikos ol mama i kamapim laip, na ol meri i holim wol, yumi mas wok strong long promotim ol mama na protektim ol meri,” Pop Francis i tok.

“Hamas vailens i save kamap long ol meri! Stopim nau! Pasin bilong kamapim vailens long ol meri em i olsem yu tok nogut long God husat i bin kamap long wanpela meri – i no long angelo, na em i no kamap nating, em i kamap long wanpela meri,” Pop i toktok long Maria, mama bilong Jisas.

Long mun Desemba, Pop i bin kamap long wanpela televisen program long Itali na em i tokim wanpela meri em man bilong em i save paitim em oltaim olsem ol man husat i kamapim vailens long ol meri, i mekim pasin bilong satan.

Long taim COVID-19 pandemik i kamap klotu tupela yia i nau, Pop Francis i wok long toktok egensim pasin bilong vailens long ol meri bikos sampela kantri i lukim dispela hevi i kamap bikpela long taim bilong lokdaun. - Reuters