100 Rohingya asailum sika husat i wok long drip long solwara long 28 de i go sua long nambis bilong Indonesia.

NEVI bilong Indonesia i bin larim moa long 100 Rohingya asailum sika husat i wok long drip long solwara long 28 de i go sua long nambis bihain long presa i bin kam long ol lokal na intenesenel human raits grup.

Pastaim long dispela, gavman bilong Indonesia i laik rausim bot bilong ol dispela asailum sika i go bek long solwara tasol bihain em i senisim tingting na larim ol i go sua. Bot bilong ol i bin drip ausaut inap long 28 de olsem na gavman bilong Indonesai i tok ol i mas stap long kwarentin long 10-pela de.

Samting olsem 14,000 refuji i stap yet long Indonesia na planti bilong ol i laik go long Australia.Nevi bilong Indonesia i tok ren na bikpela win i bin stopim wok bilong kisim ol meri na pikinini long bot i go sua long nambis we wanpela bas i bin kisim ol i go.

Ol dispela refuji i bin kam long wanpela bot we i no gat gutpela sel bilong en na ensin i bagarap na wara i wok long go insait long en. Oktina Hafanti wanpela opisa bilong United Nations High Commissioner for Refugees (UNHCR), i tokim ol ripota olsem i bin gat105 refuji long dispela bot we 50 em ol meri na 47 em ol pikinini.

Bai ol i stap long kwarentin namel long 10 na 14 de we ol helt woka bai i testim ol long COVID-19. Bihain long kwarentin bai ol i go long ol kemp long Medan na Surabaya.

Dispela sip i bin drip inap 28 de long solwara na gavman bilong Indonesia i tok bai ol i givim kaikai na wara na salim bot i go bek long solwara. Tasol bihain ol i kisim ripot olsem i gat hul long bot na i no seif.

UNHCR wantaim Amnesty International i bin singaut strong long Indonesia long larim ol refuji i go sua. Long taim ol pipel bilong Indonesiia i lukim video bilong ol dispela tarangu lain, ol i bin joinim UNHCR na askim gavman long kisim ol dispela lain.

Ol Rohingya em ol liklik lain Muslim bilong kantri Myanmar we gavman i save mekim nogut long ol. Indonesia em i wanpela bikpela Muslim kantri long wol. Moa long 700,000 Rohingya Muslim pipel i ranawe long Myanmar i go stap long ol refuji kemp long Bangladesh long Ogas 2017, bihain long gavman bilong Myanmar i stat long kilim ol na kukim ol haus na propeti bilong ol.

"Mipela i amamas Indonesia i wanbel na soim pasin bilong putim laip bilong ol pipel i go pas,” Ann Maymann bilong UNHCR long Indonesia i tok.

Ol Rohingya Muslim refuji bilong i save kisim bot i go long ol kantri olsem Malaysia, Thailand na Indonesia namel long mun Novemba na Epril, taim solwara i slip isi. (ABC/ wires).

PINIS.