FUNERAL lotu bilong Asbisop Desmond Tutu i bin kamap long las wik Sarere long St George Cathedral long Cape Town, Saut Afrika.

Desmond Tutu i bin Asbisop bilong Angliken Sios long Saut Afrika. Bipo long em i bin dai, Asbisop Tutu i bin tok em i no laik ol i spendim bikpela mani long kofin na funerel sevis bilong en. Olsem na ol i putim bodi bilong em long wanpela bokis ol i wokim long diwai pain. Na bihain long lotu ol i yusim nupela wei ol i kolim aquamate long krimetim bodi bilong em. Bihain long dispela bai ol i putim bihain long altar long St George Cathedral. Long taim bilong funeral sevis, meri bilong em, Nomalizo Leah i bin karamap long pepol laplap, kala bilong klos bilong Asbisop Tutu, na em i bin sindaun long wilsia. Presiden bilong Saut Afrika, Cyril Ramaphosa i bin go pas long ol arapela lida long toktok long dispela funeral sevis. Olgeta lain i givim luksave long Asbisop Desmond Tutu olsem wanpela man husat i no pret long sanap na toktok strong egensim pasin bilong mekim nogut long ol blakskin pipel long Saut Afrika, na tu long ol arapela pasin nogut long ol manmeri long olgeta kantri long wol. Em i bin kisim Nobel Peace Prais long dispela wok bilong em long 1984 we em i kisim bikpela luksave long stopim vailens na egensim pasin bilong apetaid we i tambu long ol blakskin na waitskin pipel i bung, na we liklik lain waitskin pipel tasol i ranim gavman bilong Saut Afrika long planti yia stat long 1948. Leah Tutu (namel) i karamap long pepol laplap, kala bilong klos bilong Asbisop Desmond Tutu. (Reuters: Jaco Marais) Long Fonde na Fraide, taim kofin bilong en i bin stap insait long haus lotu, planti tausen manmeri i bin sanap long lain long tok gutbai long en. Nelson Mandela, namba wan blakskin Presiden bilong Saut Afrika, husat i bin dai long Desemba 2013 i bin gutpela pren bilong Asbisop Tutu. Em i tok Asbisop Tutu i karim “maus bilong olgeta manmeri husat i no gat maus.”  Lida bilong Angliken Sios long wol, Asbisop Justin Welby i bin tok "Long taim yumi bin stap long tudak, em i bringim lait i kam.” "Long taim lait bilong planti ol wina bilong Nobel i wok long go daun, lait bilong Asbisop Tutu i wok long kamap strong moa.” (Reuters/ ABC)