LONG taim bilong amamasim Nu Yia long Frans, ol yangpela pipel i save kukim ol empti kar i stap arere long rot. Tasol long dispela yia ol i bin kukim 874 kar tasol long amamasim Nu Yia.

Ol ripot i tok dispela kain pasin bilong amamasim Nu Yia i bin stat long isten Frans long 1990 samting. Long 2019, ripot i tok ol pipel i bin kukim 1,316 kar long Nu Yia. I no bin gat ripot bilong las yia bikos i bin gat lokdaun bilong COVID-19 long olgeta hap long Frans na ol pipel i stap insait long haus. I bin gat moa polis i bin patrol long ol strit long Nu Yia olsem na i no gat planti bikhet pasin i kamap. I gat lo bilong hamas pipel i ken bung long wanpela hap na ol pipel i mas putim mask long pes bilong ol. Omicron variant bilong COVID-19 tu i stopim ol pipel long amamasim Nu Yia long ol pablik ples.  Long Nu Yia, ol pipel i bin kukim 874 kar tasol long ol strit long Frans. (AFP: Frederick Florin) Wankain olsem ol arapela kantri, Frans i save lukim pasin bilong kukim ol kar i kamap. Sampela lain i save kukim kar long haitim stil pasin ol i wokim, sampela i kukim kar long putim giaman kleim long kisim insurens mani. Tasol dispela pasin bilong kukim kar long makim Nu Yia em i nupela pasin.