KLOSTU wan tausen (1,000) haus i bin paia na planti moa i kisim bagarap long ol strit long Colorado, USA bihain long strongpela win i bin karim paia i go kukim olgeta samting long dispela hap.

Dispela birua i bin kamap long las wik Fonde. Ol paia paita i no inap long stopim paia bikos win i bin strong tru na i winim ol long kilim indai dispela paia. Ples i bin drai tru olsem na i isi long win i karim paia antap long het bilong ol diwai i i go hariap tru na kukim ol haus na arapela samting. Win i bin karim dispela paia i go inap long moa long 24 skwea kilomita na kamapim bikpela bagarap tru long ol haus na propeti na long envairomen tu. Strong bilong dispela win em inap long mak bilong 169 kilomita wan aua. Ol famili i bin kirap nogut na i ranawe nabaut long taim ol i kisim ripot long hariap na lusim haus bilong ol long Fonde. Long taim ol i bin go bek long Fraide long sekap, sampela bilong ol i no gat haus, tasol wan wan i laki long lukim haus bilong ol i stap seif. Ripot bilong Kaunti Serif Joe Pelle i tok ol i wok long mekim wok painim yet long as bilong dispela paia. Ol polis i no tokaut yet long ol tripela pipel husat i bin dai long dispela birua tasol ol midia i tok wanpela bilong ol em wanpela meri krismas bilong en i 91 yia. Em i no inap long ranawe hariap na i bin dai long paia. Ol ripot i tok strongpela win i karim paia i go kukim planti ol haus long ol strit namel long Denver na Boulder na planti tausen manmeri i kisim bikpela hevi tru nau. Dispela paia i bin stat long Fonde na long Sarere nait, sno i bin pundaun na karamapim ples tasol ol i ken smelim yet smok bilong dispela paia. Plant i famili husat i bin go bek long sekim haus na propeti bilong ol i no inap kisim ol samting bikos sno i kamapim narapela hevi gen. Ol National Guard i sambai na blokim ol strit long ol Humvee kar. Ol volantia bilong Red Cross i wok long givim ol blanket na arapela samting long helpim ol pipel husat i no gat haus moa. Ripot i tok samting olsem 7-pela pipel i bin kisim bagarap long hap bilong Louisville na Superior, em ol  taun i stap samting olsem 32 kilomita not-wes long  Denver na populesen bilong tupela wantaim em 34,000 manmeri. Presiden Joe Biden i tokaut long las wik Fraide olsem dispela eria em i disasta eria na i givim oda long nesenel gavman i helpim ol pipel husat i bin kisim bagarap. Ol ripot i tok tu olsem dispela kain paia i kamap leit long dispela yia bihain long ples i bin drai tru we i no bin gat ren inap planti mun. Sno i no bin pundaun tu inap long las wik Sarere bihain long paia i bagarapim ples. Ol saintis i tok klaimet i senis i mekim ol senis i kamap long taim bilong san na ren, na long taim paia i kamap, em i save kamapim bikpela bagarap tru. Ren i no bin pundaun long 90 pesen bilong Boulder County na ples i bin drai olgeta. (AP)