TRANSPARENCY Solomon Islands (TSI) i lukim olsem wanpela rot tasol long stopim korapsen long ol politikol lida long kantri em long lukim olsem ol pipel i save gut long politikal, ligal na sivil raits bilong ol.

Ekseketiv Opisa bilong TSI, Ruth Liloqula i tok pawa em i stap long ol pipe. Ol i ken stopim korapsen sapos ol i save long ol dispela raits bilong ol, na i no votim ol korap pipel i go makim ol long palamen.

Em i mekim dispela toktok bihain long wanpela Global Corruption Barometer o sevei long Pasifik we i lukim olsem Solomon Ailan na Papua Niugini em tupela kantri long Pasifik we korapsen insait long gavman na bisnis i bikpela moa. Maski sapos dispela sevei i tok olsem long korapsen, Ms Liloqula i tok Solomon Ailan na PNG i gat fri media we i winim ol arapela kantri long Pasifik.