GAVMAN bilong Australia bai glasim gen program bilong en long kisim ol woka bilong ol Pasifik ailan kantri i go wok long ol fam long Australia bihhain long planti bilong ol i ranawe lusim wok bilong ol.

Long moa long wanpela yia samting olsem 12,000 sisenel woka bilong Vanuta, Solomon Ailan, Tonga na Samoa i bin go wok long ol fam long Australia. Tasol ripot i tok moa long 1,000 bilong ol dispela woka i bin ranawe lusim wok bilong ol. Gavman bilong Australia i bin putim ol awenes posta long dispela ol woka tasol nau planti lain it ok dispela kempen bilong gavman i no gutpela bikos em i bringim sem na mekim long ol sisenel woka i pret. Wanpela pastoral kea woka bilong Bundaberg, Jeff Smith i tok planti lain i pret long taim ol i lukim dispela kempen bilong gavman.  “Olgeta toktok long ol posta i mekim ol pipel i pret, i no gat marimari long en,” em i tokim Pacific Beat. Wanpela risetsa long Australian National University (ANU), Mike Rose i sapotim toktok bilong Mista Smith. Em i tok gavman i no yusim dispela sans long sapotim ol dispela woka. “Em i no laik painimaut watpo dispela hevi i kamap na givim infomesen long wanem kain helpim ol i ken kisim na raits bilong ol. Dispela kempen bilong gavman i bilong pretim ol pipel tasol,” em i tok. Dispela kempen posta bilong gavman e mol i tanim i go long faivpela tokples, Solomon Ailan Tok Pisim, tokples bilong Timore Leste, na Vanuatu Bislama tasol bihain long ol komplen i kamapm gavman i bin rausim long website bilong en. Wanpela man i makim Dipatmen bilong Foren Afeas na Tred i tokim ABC olsem ol i glasim gen ol toktok na piksa bihain long ol i kisim ol toktok i kam long ol pablik. ANU riseta Mike Rose i tok em i hop gavman bai skelim tingting bilong ol pipel long ol dispela kain posta. “Sapos gavman it ok tru long gutpela pren i gat wantaim ol kantri long Pasifik na gutpela wok ol dispela woka bilong Pasifik i mekim, mipela i hop bai em i harim ol toktok ol pipel i mekim egensim dispela pasin em i mekim nau.”