OPOSISEN memba bilong Palamen, na MP bilong East Are’are, Peter Kenilorea Junior i tok em i egensim konstitusen bilong kantri long gavman i gohet long skruim taim bilong palamen i go long wanpela yia moa,

sapos em i no mekim senis long konstitusen bilong kantri. Mista Kenilorea i mekim dispela tokktok bihain long sampela ripot i tok Kebinet, Opis bilong Spika, Ilektoral Komisin, na ol provinsal lida i tingting long skruim wanpela moa yia i go long taim bilong palamen. Nau yet, laip bilong palamen long Solomon Ailan em foapela yia. Ol i laik senisim na skruim taim i go long faivpela yia. Gavman i tok kantri bai hostim Pacific Games long neks yia and ol wok redi bilong yusim baiometrik rejistresen bilong ol vota bilong narapela jeneral ileksen bilong kantri em long 2023. Mista Kenilorea i tok olsem gavman i gat namba long senisim konstitusen tasol dispela disisen bilong skruim taim bilong palamen em i bikpela samting na mobeta ol pipel bilong kantri yet i mas mekim dispela disisen. Em i tok wanpela gutpela wei em long ol politkal pati na grup husat i laik skruim taim bilong palamen i makim ol kendidet bilong ol long kempen long dispela ajenda long 2023 ileksen. Sapos ol i win, orait em i soim olsem ol pipel i sapotim ajenda bilong skruim taim bilong palamen i go long faivpela yia. Em i tok tu olsem nau em i no gutpela taim na ol lida i no kisim tokorait bilong ol pipel long skruim taim bilong palamen. Tasol bikos ol i gat namba, ol i ting olsem ol i ken skruim taim bilong ol long palamen na i no wari long kisim tingting bilong ol pipel.