SIK COVID-19 i wok long kilim planti pipel long PNG nau tasol long sampela provins ol pipel i no kisim gutpela toksave na tok lukaut long dispela sik.

Planti bilong ol i no bisi tumas long bihainim ol nupela pasin bilong stap seif. Wanpela meri lida long Wes Sepik Provins, Dorothy Tekwie i tok ol i wok long harim olsem i gat bikpela hevi i kamap pinis long ol provins olsem Isten Hailans, tasol planti pipel i no bilip tumas long dispela sik. Ms Tekwie em i wanpela meri husat i save go pas long karim hevi bilong ol mama na long wok politiks. Em i tok ol manmeri long taun bilong em long Vanimo i wok long putim mask long wanem nau gat ol polis i raun long lukim olsem ol manmeri i mas putim mask long pes. Tasol em i tok ol pipel i no putim gut dispela ol mask long pes bilong ol.