PRESIDEN bilong Solomon Ailan Kaunsil ov Tred Yunion (SICTU), David Tuhanuku i tok olsem SICTU i luksave long bikpela hevi dispela Delta variant bilong COVID-19 i ken kamapim long ol komyuniti long taim em i kam insait long kantri.

Em i tok ol bikpela kantri long wol tu i wok long kisim hevi long Delta variant olsem na dispela sik inap bagarapim tru Solomon Ailan bikos i no gat inap haus sik na helt senta wantaim ol medikol risos. Tasol Mista Tuhanuku i tok bikpela wari bilong ol nau em long toktok bilong gavman long rausim ol wokmanmeri bilong en husat i no kisim ful veksin bilong COVID-19 long pinis bilong mun Desemba 2021.

Em i tok sapos gavman i gohet long mekim dispela, bai Kaunsil ov Tred Yunion i mas sanap long helpim ol memba bilong en long pablik na praivet sekta wantaim long raits bilong ol aninit long lo. Mista Tuhanuku i tok nau em i taim bilong ol emploiya na ol mausman bilong ol yunion bilong ol woka long sindaun na toktok long raits na entaitelmen bilong  ol woka. Em i tok tu olsem gavman i mas save olsem wan wan woka long Solomon Ailan i save lukautim planti pipel long famili na ol wantok tu. Olsem na sapos gavman i rausim sampela woka bilong en bai planti pipel moa i bungim bikpela hevi.