GAVANA bilong Nesenel Kepital Distrik (NCD) Powes Parkop i tok em bai i no inap putim siti long lokdaun maski sapos COVID-19 i wok long kilim moa manmeri olgeta de na givim bikpela hevi tru long Pot Mosbi Jenerel Hospital (POMGEN).

Mista Parkop i tok POMGEN i nidim K2.5 milien long mekim ol wok bilong en. Em i tok COVID-19 i givim bikpela hevi tru na em i wetim Minista bilongTreseri long givim sampela helpim mani long POMGEN na long Taurama Aquatic Senta, we St John Ambulanc i lukautim ol pipel husat i gat COVID-19. Gavana Parkop i mekim strongpela singaut long ol manmeri long bihainim ol pasin bilong aburusim sik COVID-19 na tu long tingting gut na kisim banis sut o veksin.  Em i tok nau yet, samting olsem 5 pesen tasol bilong populesen bilong kantri i kisim ful banis sut pinis. Mista Parkop i tok moa olsem POMGEN i nidim olgeta helpim em i ken kisim ausait long kantri long wanem ol woklain bilong haus sik tu i wok long sik, na i no gat inap wokman meri long heplim ol sik manmeri. Long wankain taim, Mt Hagen haus sik i tok las wik i bin gat 39 pipel i dai long sik COVID-19 we 38 bilong ol i no bin kisim banis sut. Ol 100 woklain bilong haus sik i kisim tu sik COVID-19 long dispela taim.