GAVMAN bilong Australia na Papua New Guinea i tokaut las wik olsem dispela 2013 Regional Resettlement Arrangement namel long tupela bai pinis long 31 Desemba 2021.

Aninit long dispela agrimen, Australia i bin salim ol asailum sika i go long Manus Ailan. Ol dispela lain i bin hait na kalap long ol bot na traim go long Australia tasol gavman bilong Australia i bin holim kalabusim ol na salim sampela i go long Manus na ol arapela i go long Nauru Ailan. Stat long 1 Janueri 2022, bai PNG gavman yet i lukautim olgeta rijonal prosesing wok na lukautim tu ol dispela 120 asailum sika na refuji husat i stap yet long PNG. Long taim dispela ditensen senta i bin op long Manus long January 2014, moa long 1,350 ol asailum sika i bin stap long dispela senta. Australia i bin pasim dispela ditensen senta bihain long Suprim Kot bilong PNG i tok ol i brukim lo long kalabusim ol dispela pipel long Manus. Australia i salim sampela bilong ol dispela lain i go long Nauru, na ol arpela i go long USA na sampela arapela kantri. Tude i gat 120 bilong ol dispel asailum sika tasol i stap long Pot Mosbi na wetim, eplikesen bilong ol long go long ol arapela kantri. Gavman bilong Australia na PNG i tok, ol dispela asailum sika i ken go stap long Nauru na wetim epliksen bilong ol o ol i ken kamap sitisen bilong kantri, o gavman bilong PNG bai mekim wok bilong painim narapela kantri long kisim ol. Nurul Islam em i wanpela bilong ol dispela asailum sika husat i stap long Pot Mosbi. Em i tokim Marian Faa bilong ABC olsem, em i no laik go long Nauru na em i no laik stap long PNG long wanem em i no pilim seif. Em i tok em i laik go long narapela kantri. Ruth Mandrakamu husat i Meya bilong Lorengau Taun long Manus, i hoilim dispela wok inap 5-pela yia stat long 2013 taim dispela ditensen long Manus i bin op. Em i tok em i amamas olsem gavman bilong tupela kantri i pasim tok long pinisim dispela program bilong salim ol asailum sika i go long PNG. Em i tok PNG i gat ol hevi bilong en yet long intenel maigresen na gavman i mas putim ai pastaim long dispela.