LONG las wiken brekaut bilong COVID-19 i kisim laip bilong 54 pipel long French Polynesia. Ol namba i kam long helt atoriti i soim narapela 2,745 infeksen insait long 72 aua tasol.

Namel long ol 349 i stap long haus sik na 48 bilong ol i stap long intensive kea o ICU. Planti bilong ol keis i stap long Tahiti tasol nau COVID-19 i go long ol arapela ailan tu. Ol atoriti i putim pinis wanpela lokdaun bilong tupela wik. Long wankain taim ol i apim ol wok bilong givim veksin long ol pipel. Namel long mun Mas na Julai COVID-19 i bin pinis olgeta long Tahiti tasol wantaim kam bilong Delta Variant COVID-19 i kam bek na i kamapim planti bagarap nau. Maski planti awenes i go aut pinis long ol pipel i mas kisim veksin i no planti lain i kisim veksin. Las wik Fraide gavman i mekim lo olsem olgeta medikol woka na ol lain i save wok wantaim ol pipel i mas kisim veksin.

Long Julai las yia French Polynesia i bin opim dua bilong en gen na larim ol visita i go bek long dispela kantri. Stat long dispela taim i kam ol i rekodim pinis 39,000 COVID-19 keis na 311 indai long las mun.