BIPO praim minista bilong Samoa Tuila’epa Sa’ilele bai i kisim moa sas long suprim kot long em i traim long stopim palamen long bung long Me 24 dispela yia.

Dispela lida bilong Human Rights Protection Party (HRPP) bai i kamap long kot bikos em i bin traim long stopim nupela gavman bilong Samoa aninit long lidasip bilong nupela Praim Minista long holim palamen bung long Me 24. Ol arapela lain husat bai i kamap long kot tu em atoni jeneral Savalenoa Mareva Betham-Annandale, bipo spika bilong palamen na klak bilong palamen. Ol bai i bekim ol askim tu long dispela hevi. Loya bilong FAST, pati we i rul nau long Samoa i tok bai i gat moa sas egensim bipo praim minista Tuila’epa. Long mun Me suprim kot i bin givim oda long palamen i mas bung long inapim rikwaimen bilong konstitusen. Tasol nupela gavman wantaim lidasip bilong FAST pati i no bin inap bung taim Tuila’epa i givim oda long stopim bung. Namel long taim tupela pati i pulim yet tok bilong husat i mas stap praim minista bilong Samoa Tuila’epa i bin putim sampela bikpela tok egensim ol kot na jas tu. Loya bilong FAST Taulapapa Brenda HeatherLatu i tok Tuila’epa i bin mekim sampela bikpela tok we i bagarapim ol jas stat long 28 Julai. Olsem na ol bai i failim moa mosen bihainim ol toktok bilong Tuila’epa. Ol i makim pinis wanpela jas long Nu Silan long harim dispela kot. Dispela em ol i tok long bai abrusim konflik ov interes namel long ol pati.