TAIM yu krungutim Kabul Intenesenel ples balus bai yu pilim olsem wanpela ston i pairap long het bilong yu. Ol pipel i pilim ol i mas ranawe hariap tasol, nogat ol i mas wet liklik pastaim.

Long olgeta hap ol pipel i lukluk ol i lukim ol militari balus bilong olgeta kantri i kam long kisim ol pipel bilong ol. Antap long skai ol helikopta i flai. Long dua wan wan ol militari balus longpela lain bilong ol pipel bilong Afghanistan i lain na traim long kisim spes insait long balus. Tasol dispela ol lain i nogat pinis bilong ol. Ol i holim wanpela sutkes tasol na wet long ranawe lusim kantri bilong ol we nau Taliban i kontrolim. Tasol ol i no lusim kantri bilong ol tasol. Ol i ranawe nau lusim ples ol i stap long en na ol i bildim long en na ol driman ol i gat long en long moa long 20 yia olgeta. Ol I tok i gat 14,000 pipel insait long dispela ples balus we US militeri i kontrolim. Olgeta i wet long kalap long wanpela balus na ranawe.

Wanpela namel long ol em frilens jenelis Bilal Sarwary. Sarwary em i gat yangpela famili na em i bin wok hat tru long bildim sindaun na laip bilong em long Afghanistan tasol nau em i mas ranawe na lusim olgeta samting i stap. Sarwary i bin wok pastaim wantaim BBC, wanpela bikpela intenesenel nius kampani. Em i gat wanpela liklik pikinini meri. Nem bilong pikinini meri em Sola. Long tok ples bilong em Sola i min bel isi (peace). Em i plen long stap long Kabul na pikinini meri bai i gro long hap. Nau em i hop olsem wanpela de Sola bai i klia long dispela disisen em i mekim long dispela taim long ranawe. “Em i de ol yangpela Afghan i planim ol driman na laip bilong ol na ranawe,” Sarwary i tok. “Kabul siti em i ples bilong mipela. Maski planti toktok i stap em I ples bilong mipela. Mipela i bikpela long hia. Mipela i hop olsem Taliban i ken lainim long ol ekspiriens bilong bipo,” Sarwary i tok. Ol US militeri long Kabul Intenesenel ples balus i ripot olsem klostu 17,000 pipel i ranawe pinis long las wik. Tasol ol i no klia hamas em ol Afghan sitisen. Sarwary i pret planti save manmeri bilong Afghanistan i ranawe na em i tok, kantri i nidim ol gutpela pipel na dispela ol pipel i no gro long diwai. Ausait long ples balus moa long 10,000 pipel i wet yet long go insait na kisim spes long balus na bel bilong ol i no stap isi. Ol i pret na i laik ranawe hariap tasol.