MASKI sapos i luk olsem i no gat hevi long Solomon Ailan, i gat planti hevi bilong nesenel politiks na sekyuriti i stap. Sampela bilong ol dispela hevi em wanpela ripot i tok wanpela grup i karim ol gan na i laik tekova long gavman.

Ripot bilong politikal instabiliti tu i mekim na ol nesenel MP, na planti tausen pipel bilong Malaita long Honiara i sainim petisen long mas i go givim long praim minista. Polis Komisna bilong Royal Solomon Ailan Polis Fos, Mostyn Mangau i tokaut olsem ol polis i no laik lukim ol grup wantaim gan o ol kriminal i bagarapim nesenel sekyuriti na strong bilong kantri. Ol nius ripot i bin karim nem bilong Primia Daniel Suidani bilong Malaita Provins. Oposisen lida Mathew Wale, i bin tokim ol polis long lukaut gut long taim ol i mekim ol wok painim long Mista Suidani na gavman bilong em. Dispela hevi i go bek long taim nesenel gavman bilong Solomon Ailan i bin lusim Taiwan na givim luksave long gavman bilong Saina. Polis Komisina Mangau i tokaut olsem ol polis i no mekim wanpela investigesen long Primia Suidani. Em i tok tu olsem ol i no bin gat wanpela plen long arestim Mista Suidani long Honiara bihain long em i bin kam bek long Taiwan we em i bin go kisim medikol tritmen. Ol nius ripot i tok tu olsem planti tausen pipel bilong Malaita husat i stap long Honiara, i bin sainim wanpela petisen long mas i go na givim long praim minista. Dispela petisen i autim tingting bilong ol pipel long ol hevi ol i laik gavman i mas lukluk long en. Oposisen lida, Mathew Wale i tok olsem Polis Komisina wantaim Honiara Siti Kaunsil, i mas larim ol pipel bilong Malaita i mas i go givim petisen long praim minista. Sampela nius ripot i tok, ol 28 memba bilong palamen i lusim gavman na go joinim oposisen. Tasol gavman i tokaut olsem dispela em ol giaman ripot bikos gavman i stap strong wantaim olgeta memba bilong en. Gavman i tok dispela kolisen gavman bilong Praim Minista Manasseh Sogavare i stap strong na i mekim ol wok long lukim olsem COVID-19 i no go insait na bagarapim ol pipel na ikonomi bilong kantri. Ekeseketiv Opisa bilong Transparency Solomon Island, Ruth Liloqula i tok nesenel politiks bilong kantri i bagarap na i no bihainim stret konstitusen bilong kantri. Ruth Liloqula em i bin wanpela pablik sevan bipo long Solomon Ailan i kisim independens long 1978. Em i tok ol politisen bilong tude i save tingting tasol long ol yet na i no moa tingting long wari bilong ol pipel.