DAIREKTA bilong Papua New Guinea Institute of Medical Research (PNGIMR), Dr William Pomat, i tok Praim Minista James Marape i no bin kisim olgeta infomesen long wok bilong PNGIMR long dispela Covid-19 pandemik.

Dr Pomat i mekim dispela toktok bihain long Praim Minista, i bin mekim sampela strongpela toktok long wok bilong PNG IMR las wik. Mista Marape i bin askim long wanem kain wok PNGIMR i mekim long risets long sik COVID-19 long kantri. Em i tok em i no lukim wanpela hanmak bilong ol long ol arapela hevi bilong helt.

Mista Marape i tok risets i wanpela bikpela samting insait long PNG, tasol ol savelain i mas kamap ples klia na toksave na gavman i ken putim mani long helpim wok bilong ol. Dr Pomat i tok em i bilip Praim Minista i no bin kisim toksave gut long wanem wok PNGIMR i mekim long dispela taim long helpim long pait egensim sik COVID-19. Dr Pomat i tok em i bin toktok pinis wantaim Praim Minista na toksave long wanem kain wok PNGIMR i wok long mekim long helpim ol pipel long abrusim COVID-19 na ol arapela risets wok.