POLIS Komisina, David Manning, i tok klia olsem dispela wok painim we nau i kamap long K268 milien bilong ol pipel bilong Westen Provins i wok long gohet yet. Em i tok tu olsem i no gat wanpela pasin politiks i stap insait long dispela wok.

Komisina Manning i tok olsem Spesel Polis Forensik Kriminal Investigesen tim aninit long PNG Polis Fos i go pas long en. Em i tok i gat tokwin olsem i no gat wanpela mani i go long ol lain bilong Westen Provins husat i mas kisim dispela mani. Em tok klia olsem dispela mani i bilong moa long 148,000 pipel insait long 158 ples long Westen Provins. Dispela mani i bin stap long lukaut bilong Ok Tedi Fly River Development Foundation Limited. Mista Manning i tok klia olsem dispela fraud keis em wanpela bikpela keis we PNG Polis i wok long mekim wok painim long en nau, insiat long histori bilong RPNGC.