OL bisnis long Westen Divisen bilong Fiji i singaut long gavman long putim wanpela nesenel lokdaun
namel long bikpela hevi bilong COVID-19 long kantri.

Tasol Praim Minista Frank Bainimarama i tok em
bai i no inap pasim olgeta samting long wanem dispela bai i bagarapim ikonomi bilong Fiji na bai i gat
impek long ol wok. Nau i gat moa long 18,000
pipel wantaim positive keis i stap long aisolesen na moa long 190 indai. Nadi Semba bilong Komes na
Indastri i tok gavman i ken winim hed imuniti (olgeta bihainim wanpela na narapela) haria sapos em i
pasim olgeta wok na bisnis na lukluk long veksinesen long olgeta populesen. Semba presiden Dr Ram
Raju i tok helt kea sistem
bilong Fiji i no inap long givim gutpela helt kea na lukaut long olgeta pipel. Helt sistem i sotwin tru pinis,
Dr Raju i tok. Ol mog i pulap. Na i luk olsem bai i nogat pinis bilong dispela sik. Ol helt kea woka, ol lain i
wok long franlain i sotwin na sampela i pret tu long laip bilong ol. “Em i taim gavman i lukluk bek hariap
long ol strateji
bilong en we i stap nau long banisim COVID-19 pandemik, kontrolim na menesim dispela sik long wanem
ol i no wok long stopim pandemik. Dr Raju i tok gavman i mas tingting long wokim total lokdaun long
kantri olgeta wantaim helpim bilong ol arapela pablik helt ekspet husat i gat ekspiriens long menesim
kain ol autbrek bilong ol kain sik.