PLANTI tausen pipel i mas long Sydney long las wik Sarere long pusim gavman bilong ol long Australia
long rausim ol lokdaun mesa.

Long wankain taim tu ol liklik protes i kamap long Melbourne na Brisbane.
Polis i arestim pinis 57 pipel husat i protes long Sydney na
sasim ol na ol 500 i baim fain. Long Sande long New South Wales (NSW) Primia Gladys Berejiklian i tok ol
protesta i mas sem. Planti milien pipel long ol stet bilong mipela i mekim samting stret, na lewa bilong
mi i bruk long lukim ol pipel i no tingim ol arapela sitisen, em i tokim ol
ripota. Sydney i rekodim 141 nupela COVID-19 infeksen long Sande, na dispela na namba tu bikpela
namba long kamap long wanpela de long dispela yia. Nau i gat pret olsem bihain long protes long Sarere
sampela moa nupela keis bilong COVID-19 bai i kamap. Ol atoriti long NSW bai i
surukim taim bilong lokdaun i go yet na bai i pinis long 30 Julai. Namba olsem 13 milien pipel bilong
Australia I stap bek long lokdaun bihain long gavman bilong ol i putim gen lokdaun long banisim ol yet
long binatang nogut bilong Delta Variant, we i apim ol COVID-19 keis long kantri.