Sam Seke MEMBA bilong Ioro Konstituensi long Sentral Bogenvil, Theonila Roka Matbob husat i go pas
long ol wok bilong lukim jastis na gutpela sindaun gen bilong ol pipel we i wok long bungim hevi bilong
bipo maining long Panguna, i amamas long lukim stat bilong ol dispela wok.

Misis Matbob i tok olsem
tude bihain long Rio Tinto i nau mekim komitmen long em bai givim mani bilong karim aut wanpela
independen enviromen na human rait impek asesmen long ples em i bin karim aut maining long
Panguna bipo. Memba Misis Matbob i bin go pas makim 156 pipel bilong ples wantaim helpim bilong
Human Rights Law Centre long mekim komplen egensim Rio Tinto i go long wanpela han bilong Australia
gavman ol i kolim Australian OECD National Contact Point o AusNCP long mun Septemba las yia. Bihain
long dispela AusNCP i lukluk long ol dispela komplen long sait bilong ol bikpela pipia polusen we maining
i bin kamapim na bikpela hevi i bin kamap long laip na ples bilong ol pipel, Rio Tinto na Human Rights
Law Centre i bin tokaut long wanpela join stetmen tude long dispela komitmen. Misis Matbob i tok
bihain long dispela asesment wok, em i laik lukim bai ol pipel we i bungim ol kainkain hevi we i bin
kamap long maining polusen, ol i ken stap gut gen long bel isi na putim ai na stap insait long proses
bilong Bogenvil i kamap wanpela independen kantri