KONIAMBO Nikel plant I traim long kirapim ol wok operesen bilong en gen tasol em i feil.

Wanpela grup i
pasim dispela nikel main long wok na tok olsem ol tenda proses bilong kampani i sakim ol lokal bisnis i
go long sait. Dispela protes eksen i pusim kampani long pasim wok
operesen bilong en tasol em i plen long kirapim wok gen bihain long tupela wik. Em i tok dispela pasim
wok em i no gutpela long bisnis. Tasol ol protesta i pasim ol planti handret wokmanmeri long no ken go
bek long wok. Koniambo em i wanpela
bilong ol tripela nikel main long Nu Kaledonia na em i wanpela impoten indastri ektiviti long provins em i
stap long en. Liklik wokmanmeri tasol i stap long ples bilong wok long was long ol samting.
Dispela nikel plant em wanpela
join vensa namel long Noten Provins SMSP na bikpela kampani Glencore-Xstrata. Dispela plant i bungim
planti teknikel hevi pinis long dispela yia. Glencore bai i putim narapela US$250 milien long dispela plant
long dispela yia.