OL NUPELA long Nesenel COVID-19 kontrola long PNG i soim olsem 627 pipel tasol long Bogenvil i kisim
veksin. Namba bilong olgeta pipel long Bogenvil em klostu 300,000. Wankain olsem Papua Niugini liklik
lain pipel tasol long Bogenvil i kisim veksin bilong COVID-19.

As bilong dispela em olsem ol i harim planti paul toktok o toktok i no stret long sosel midia. Dairekta
bilong Leitana Nehan Women’s Development Agency, Helen Hakena i tok, ol pipel i bin amamas taim
veksin i kamap na ol i harim tu olsem ol veksin i fri. Tasol em i tok, bihain long ol
stori i go i kam long sosel midia ol pipel i pret na ol i no moa go long kisim veksin. Misis Hakena i askim
sapos wanpela long ol atoriti i ken go na givim stretpela tok long ol pipel na tokim ol olsem veksin i orait
long kisim. Na tu mipela ol husat i kisim
veksin tu i ken go aut na tokaut long ol pipel olsem mipela i kisim veksin pinis na mipela i kisim bagarap o
indai. Mipela i stap orait olsem ol pikinini i kisim veksin bilong polio na ol arapela sik. Bogenvil i rekodim
tupelo indai long COVID-19 na em i gat 427 konfem keis.