BIHAINIM wanpela wokpainim bilong BBC wanpela bikpela wel pam kampani bilong Korea, Korindo i raus long wanpela bodi we i save givim setifiket long ol lain i bihainim gutpela prektis long wok wel pam.

BBC i painim evidens olsem Korindo grup i wok long baim ol bikpela hap bus long Wes Papua. Em ol las bus i stap long Indonesia.

Ol piksa i soim olsem ol i putim paia long bus, na dispela em i wanpela bikpela asua na i brukim ol lo i stap long Forest Stewardship Council (FSC).

FSC em i wanpela bodi we i stap long lukim gutpela na sastenebol menesmen bilong ol bus na graun. Logo bilong FSC em wanpela diwai. Dispela logo we i stap long olgeta pepa prodak long Inglen na Yurop em bilong soim konsuma olsem ol dispela prodak i kam long ol kampani husat i bihainim gutpela prektis long kisim ol diwai.

Taim BBC i wok long mekim wokpainimaut bilong en long pinis bilong las yia, FSC i bin tok olsem ol bai i no inap rausim Korindo tasol ol i wok long wok wantaim dispela Korea kampani long adresim ol sosel na envairomen hevi.

Tasol nau FSC i tok dispela rilesensip wantaim Korindo em i hat na ol i rausim tredmak laisens bilong Korindo wantaim FSC stat long Oktoba las yia.

Intenesenel Dairekta Jeneral bilong FSC Kim Carstensen i tok, “Mipela i no inap long sekim sapos Korindo i mekim sampela gutpela senis long pasin bilong en long wok wantaim ol pipel na envairomen.

Em i tok dispela disisen em bilong givim mipela sampela kliapela tingting na mipela ken kisim win na long wankain taim Korindo i ken traim long stretim ol pasin bilong en long wok wel pam. Sif Sastenabiliti Opisa bilong Korindo Kwangul Peck i tok insait long wanpela stetmen olsem kampani bilong en i “kalap nogut long dispela disisen bilong FSC.”

Em i tok olsem kampani i bihainim olgeta step bilong “wanpela rot ol i bin wanbel long en long mekim kamap sampela gutpela senis”.

Em i tok maski FSC i rausim ol, ol bai i go het yet long bihainim gupela pasin bilong apim sastenabiliti na human rait.

Korindo i kontrolim moa graun long Wes Papua winim ol arapela kampani.